永隆銀行（096）創辦人伍宜孫嘅細佬、現任董事長伍步高嘅阿叔伍絜宜，上個月29號騎鶴歸天，啱啱過咗嘅禮拜日舉殯，靈堂用白色花朵佈置，唔見有道教或佛教儀式，親友坐滿香港殯儀館一樓靈堂，十分安靜，貫徹伍氏家族一向低調嘅作風。以佢哋喺本地銀行界嘅地位，到嚟送最後一程嘅人唔算多，相信都係親戚同熟稔嘅好友。
伍絜宜享年101歲，屬笑喪，但見送殯嘅親戚朋友都好平靜，由伍步高同家屬先行，伍氏家族準備咗三部旅遊巴士接載親友去歌連臣角火葬場。伍絜宜兄長伍宜孫05年去世，亦係喺歌連臣角火葬場火化。伍絜宜生平慷慨，所以佢嘅家人都事先聲明，會將收到嘅帛金捐去香港心臟基金會。
兄弟送最後一程
到嚟送殯嘅金融界人士唔多，華華只係見到三位銀行家，一位係恒生銀行（011）前常務董事兼副行政總裁陸觀豪，佢05年退休，家陣由潘仲賢接任佢個職位；至於另外兩位係永亨銀行（302）馮鈺斌同馮鈺聲兄弟。
電郵：mailto:[email protected]
