食硬奧運！搶閘玩adidas手機

奧運火炬要5月先傳送到香港，但奧運熱早就殺埋身！講緊嘅唔係精品、匙扣或紀念金幣等老套嘢，而係adidas與韓國三星搞嘅Crossover手機F118。今次無靚仔碧咸做代言人，但機內特設miCoach教練模式，㩒吓掣，手機即幫你度身訂做一套訓練系統，搭埋專用運動配件，未到奧運已經操Fit咗！

記者：陳國輝
攝影：楊錦文
Model：Chimpy
鳴謝：Dahood（23889666）

玩盡三間王特徵

測心跳、計步速等Function，早前喺Nokia、SonyEricsson等手機已見識過，但講到同知名運動品牌玩Crossover，則屬首次！雖然佢結合咗Samsung，但親身接觸過之後，發現F118與傳統Samsung手機好唔同，尤其背部質感，佢勁似運動風褸內膽嘅透風位，呢種設計套用於手機上，美觀之餘更有助防跣手。當然唔少得例牌「三間王」Logo，無論機身正面或背面，同樣印有adidas標誌。官方網表示F118配備7種顏色，但場內水貨佬暫時只返咗黑色，幾時先齊色？暫時仲未有答案。

■屏幕上印有adidas標誌，必屬Fans至愛！

■機殼似風褸內膽設計，拎上手仲好輕飄飄，僅重80g。

專用臂帶測心率

拆盒一睇，「嘩！呢一塊唔係隊長臂章嘛？」睇清楚啲，其實係運動員專用手機臂帶先真！除咗外觀夠Sporty，兼印有adidasLogo和miCoach標誌之外，出面仲有一個細袋，拉埋拉鏈就啱啱好放得入一部F118。當然，佢唔止裝飾咁簡單，準備跑步之前，你仲可以接駁心率傳感器和步幅感應器，Set好晒練習數據（如健康資料、路程、步速節奏等）後，手機隨即變身為跑步教練，向你提供適當嘅意見及提示，令你練習得更有效率。