陳慧琳（Kelly）將於6月13至18日喺紅館舉行「陳慧琳LoveFighters演唱會08」，成為紅館裝修前最後一個舉行演唱會嘅歌手，所以Kelly打算喺最後一場個唱，加插特別環節，但𠵱家仲未構思好。
「搞到對腳瘀晒」
Kelly噚日喺海逸酒店開記者會，佢透露喺演唱會上分別以中東look、埃及妖后look、美人魚look同埋未來戰士造型亮相。Kelly話：「演唱會有四分三時間唱快歌跳舞，所以排舞排得好幸苦，當中有好多典地動作，搞到對腳瘀晒。」記者會期間，Kelly應司儀要求大跳中東扭腰舞，佢隨即扭動蛇腰，仲跳到bra帶滑落，好彩佢即刻擰轉面整番好條bra帶。
至於演唱會嘅服飾，Kelly話絕對唔會低胸，佢講笑話：「怕到時個胸會跌咗出嚟，我嘅極限就係中東look件衫露肚。」到時畀大家睇吓佢條蛇腰，其他衫最多都係露吓腳。嘉賓方面落實演出嘅有黎明，Kelly話希望請齊四大天王做嘉賓喎！