「蝙蝠」華倫西亞上周三啱啱捧走西班牙盃，周日聯賽作客1:5慘負畢爾包，玩過呢趟過山車，教練朗奴高文心血少啲都會暈倒當場。不過，呢位身經百戰嘅荷蘭名宿，早知道自己時日無多，相信多少已經有心理準備！
其實，上周三擊敗基達菲高舉獎盃，我求大俠睇到朗奴高文笑容牽強，屬於皮笑肉不笑。因為英超嘅熱刺同法甲嘅巴黎聖日耳門，捧走英聯盃同法聯盃後分別跌watt，後者仲跌至護級區，勢估唔到華倫亦難逃魔咒。
董事局暗示遲啲要炒
其實，華倫今季忍辱負重咁難得贏到個盃，成個城市上演嘉年華會都無可厚非。不過雖然班球員唔似熱刺咁飲到醉晒，不過心態肯定有所放鬆，畢竟以佢哋嘅實力護級冇難度。果然，幾日後就一棍俾畢爾包打暈。
朗奴高文賽後堅持唔辭職，不過言語間傳出陣陣魷魚香，「唔好問我有冇得留低，因為唔係我話點就點。」會長摩利拉就答得仲妙：「𠵱家最重要係軍心（所以唔提得個炒字），不過董事局嘅決定會以球迷利益為依歸（即係遲啲要炒）。」
周日成護級隊災難日
呢個周日亦係各支護級隊嘅災難日，英超尾3球隊伯明翰同意甲榜尾球隊里賈納，分別慘負1:5予阿士東維拉同AC米蘭。正所謂一沉百踩，希望華倫同呢班護級隊可以振作。
不過呢班波頹勢已久，唔係一時半刻可以救得番。除非好似葡超榜尾球隊利亞拿咁，撞正對手士砵亭上仗葡盃反勝賓菲加5:3而今場要「還」，所以爆冷大勝4:1，全取3分。