有「中國風險投資之父」稱號嘅人大常委會副委員長成思危，噚日到中大演講，全場座無虛席，有成二百幾個粉絲撐場，不過，成思危就笑笑口話，唔少人都唔鍾意聽佢老人家講嘢，事關每次講完對內地股市嘅睇法，個市都會有啲波動，對上一次就搞到個市跌咗7%，皆因佢最鍾意喺個個炒到㷫烚烚嗰陣潑冷水。
由中環走入中大捧成教授場嘅商務及經濟發展局局長馬時亨，平日只有人問佢嘢，噚日一反常態，十足十小粉絲咁，喺問答環節，第一個舉手搶住問，佢好尊敬咁企起身，第一句就話：「我好鍾意聽老人言㗎！」𠱁到成教授不知幾開心。
至於馬仔問乜？咪又係「內地股市點睇」之類，唔知教授今次講完，聽日個市會唔會又跌呢？