次按風暴演化成信貸危機，搵人孭鑊，矛頭直指聯儲局前主席格林斯潘。一向敢言嘅摩根士丹利前亞太區首席經濟師謝國忠，最近接受大陸傳媒《21世紀經濟報道》訪問，就數咗格老3宗罪。佢認為，格老在任期間，實行寬鬆嘅貨幣政策，迫到其他貨幣都要放鬆，先至引起全球泡沫。
形容如中國皇帝
第二宗罪係格老認為次按產品雖然風險高，但可以令更多人有買樓嘅機會，所以即使風險高都值得冒險。實情係錯晒，謝國忠話，引誘買唔起樓嘅人去買樓，只會搞到有泡沫，最錯係當大家都話監管有問題時，格老冇調整監管嘅標準。
第三宗罪係用一個泡沫去冚另一個泡沫。謝國忠話，01年科技股泡沫爆咗，格老為免可能出現嘅緊縮，要刺激經濟，所以接連減息，其實格老自知減息係為刺激樓價，通過地產抵銷科技泡沫崩潰嘅痛苦，不過，呢個世界冇免費午餐，格老咁做只係將痛苦推後。
謝國忠更加用「中國歷史上一些皇帝」形容格老，有乜含意？「好時光都讓他（指格老）佔去了，好運用完了，下一任碰到的就都是壞事情。」