豪華SUV大鬥法　章子怡撐BenzGLK

豪華SUV大鬥法　章子怡撐BenzGLK

北京今年最大盛事肯定係08奧運，但剛揭幕嘅北京國際車展亦不弱，由場地面積到新車數目均打破歷年紀錄，規模已屬國際級，單單概念車已超過50部，更有多款全球首度曝光嘅新車登場。其中Benz、BMW及Audi三大品牌不約而同催谷新款豪華SUV，而着到紅噹噹嘅章子怡出場撐GLK時，幾乎全場人士湧晒過Benz展館一睹明星風采，厲害！

記者：鄭丹、龍影
攝影：梁希
鳴謝：M.BenzHK、BMWHK、AudiHK

GLK豪華四驅　Mercedes-Benz

為進佔中型SUV市場，德國Mercedes-Benz特別推出全新GLK車系，可以話係縮水GL嘅佢，唔只賣相有幾分似，就連車廂陳設同機械配搭都頗為接近。
外形上，除卻線條同GL一樣傾向筆直同有肌肉感外，車首部份更幾乎一樣，而我個人最Buy嘅，就肯定係貼喺鬼面罩上嘅超大星形廠徽，襯埋旁邊幾近方形嘅頭燈，完全無將車廠一貫嘅貴氣作風抹掉！車廂陳設方面，前後兩排座椅可接載5名乘客之餘，內裏仲有豪到震嘅桃木裝飾。機械配搭亦有多個選擇，其中頂級GLK350用嘅係3.5V6引擎，馬力272匹，配合7G-Tronic半自動波，起步加速爽快，而4MATIC四驅系統，更令車子適合行走唔同嘅路面㖭！

■章子怡上台讚完幾句即走，不過被人潮圍住喪影。

■由車尾望過去，車身線條同GL一樣傾向硬朗。

■胎軨尺碼足有17吋，星形設計仲好吸引。

■雖然新車外觀有唔同，但車廂陳設帶有濃厚GL車系影子。

■中控台唔只設備齊，旁邊仲有好多桃木裝飾。

跑車化SUV　BMW

德國BMW近幾年先後推出X3同X5呢兩款SUV，並廣受車迷歡迎。之後似乎食髓知味，喺較早前又推出一款糅合Coupe同SUV功能於一身嘅SportActivityCoupe──X6。
講到明係一部SportActivityCoupe，所以廠方喺為X6設計造型嗰陣，都刻意勾畫出同Coupe跑車一樣嘅線條，當中車尾部份更採用斜尾設計，望落同現今嗰啲好受歡迎嘅SuperCar一樣咁型。而車廂陳設亦走近似路線，當然一雙承托力十足嘅桶椅，會是標準裝備！機械配搭方面，頂級xDrive50i配以一台4.4V8Twin-turbo引擎，可以輸出嘅馬力達407匹，勁！

■為凸顯跑車化嘅Style，車尾特別採用酷似Coupe嘅斜尾設計。

■車廂陳設跟一般BMW車系相近，同樣以舒適豪華見稱。

■尾廂空間大，幾乎擺到幾副打Golf的器材。

中型車玩豪邁　Audi

為咗可以喺SUV市場多分一杯羮，Audi繼年前推出Q7大型SUV後，又喺今屆北京車展上，展出全球首度曝光嘅Q5中型SUV。
新款Q5同佢嘅老大哥Q7有好多相似嘅地方，所講嘅唔只係車身線條，仲有就係車首設計，同樣都係以粗獷豪邁造型示人。而車廂空間亦屬闊落水平，即使全車滿載乘客，大家都可以坐得舒舒服服。引擎配搭方面，汽油版本將以2.0TFSI引擎作主力，輸出馬力可達211匹嘅同時，配上全新7前速Stronic半自動波及quattro四驅系統，無論行走嘅係高速公路抑或係泥路，都絕無問題！

■話晒係縮水版Q7，所以Q5車尾設計頗有前者影子。

■前座唔只空間闊落，最緊要係仲有個大天窗。

■後排算係闊落，而兩側車窗視野範圍亦見廣闊。

VolvoXC60

剛啱喺較早前正式登場嘅VolvoXC60，當然同其他SUV車款一樣成為車迷焦點。整體上，新車同當年嘅概念車款相似，以充滿肌肉感嘅車身線條示人，同XC90頗為相似，而車頂仲差唔多係天幕式嘅Design㖭！另外，引擎就以全新嘅3.0直6Turbo型號作動力核心，單係最大馬力輸出已可達285匹。

奇瑞悍虎2

喺國內屬大型汽車生產商之一嘅奇瑞，以美國式大Pick-up貨車作為設計平台，推出名為悍虎2嘅超型Pick-up貨車。雖然新車好多部份都予人新鮮同肌肉感強嘅感覺，無咗嗰種抄襲Feel，但當你再望真車頭，就會發覺佢同LexusRX350有啲似，莫非……

ToyotaFJCruiser

Toyota當年一款LandCruiser越野車，曾惹嚟唔少車迷注視，即使到咗今日，佢嗰個ClassicLook都仲係咁深入民心。今次廠方喺北京車展展出嘅FJCruiser，正好用咗超舊款嘅LandCruiser車頭設計，望落有型之餘，引擎仲用可輸出179kW嘅4.0公升V6型號！

MINIJohnCooperWorksChallenge

先前已經喺唔同國際車展亮相嘅MINIJohnCooperWorksChallenge，最大賣點當然係佢嘅性能表現。嗰台1,598c.c.直4引擎經JohnCooperWorks操刀改裝後，馬力同扭力輸出分別提升至211匹同260Nm，而車內亦加有桶椅及防滾架，整個格局變得同落場用賽車無異。

Mercedes-BenzSL

先前我哋去過美國作實地測試，但快者都要到5月先到港嘅全新Mercedes-BenzSL開篷跑車，今日竟畀我哋喺北京車展再次碰面。新車主要改動集中喺車頭部份，用咗新款泵把之餘，頭燈亦變成L形設計。然而，喺會場展出嘅仲係最頂級嘅SL500㖭！

VolkswagenPassatCC

咪以為VolkswagenPassat只係一款豪華房車，原來佢哋最近又推出一款名為PassatCC嘅跑車。新車造型同房車版一樣咁豪咁型之外，車廂陳設亦同出一轍。引擎則係3.6公升V6FSI型號，最大馬力及扭力輸出分別係300匹同360Nm，配合埋6前速DSG半自動波箱，咁就真係要幾快有幾快啦！

車展女郎

■雖滿場年輕美女，但我較欣賞成熟味道。

■現場唔只多洋車，洋妞都唔少。

■祖國展覽女郎特色：鍾意戴后冠。

■全場笑得最甜嘅ShowGirl。

■Audi女郎嘅服裝最有特色，隆重到似行Catwalk。

■雷諾陣營簡單一件Tee襯牛仔褲，反而幾突出。

預計60萬人進場

兩年一度嘅北京車展，今屆為遷就奧運而提前半年舉行，更移師至剛建成嘅中國國際展覽中心新館，仲破咗多項大會紀錄。當中包括總展覽面積超過16萬平方米、展出近900架車、2,100家參展單位等，大會更預計總入場人次達60萬！

■新館8大室內展館全部啓用，加上人頭湧湧，走勻全場採訪真係腳都軟。

■正門有大大隻福娃列隊歡迎，不過係軟綿綿嘅吹氣公仔。

■MINI展館力谷Clubman，成架車擺係二樓，驚你睇唔到。

「第10屆北京國際汽車展覽會」小檔案

日期：4月20至28日
（公眾開放日期為4月24至28日）
地點：中國國際展覽中心新館
地址：北京市順義區天竺地區裕翔路88號
門票：人民幣50元
官方網址： http://www.china-autoshow.com