一支奧運火炬，搞到香港班政治權貴爭相博出位。作為精英運動員協會主席嘅洪松蔭，噚日冇理坊間流傳將由港協暨奧委會主席霍震霆擔任壓軸火炬手嘅傳聞，直言從精英運動員嘅角度，負責最後一棒嘅，應該係香港首席單車手黃金寶至啱數，而第一棒就應該由風之后李麗珊負責。相信佢番言論，實在講出唔少運動員同市民嘅心聲。
洪松蔭喺《城市論壇》度話，政治唔應該同奧運掛鈎，對於𠵱家盛傳由梁振英、曾憲梓等政治人物做火炬手，佢話「呢個純粹係港協決定」，作為體育界代表，佢認為奧運主角應該係運動員，仲話今次揀火炬手嘅安排，絕對可以反映到政府同當局，究竟點睇運動員嘅社會地位。