香港演藝界成日話當今娛樂事業市道欠佳，但據八方觀察，近年有個項目唔止收視高，反應好，啲藝人仲一個接一個咁輪住嚟搞。呢片演藝界嘅藍海，咪就係道歉記者會囉。繼年初嘅天真嬌同EDC（陳冠希）開記者會就淫照事件道歉之後，噚日又輪到非禮的士司機罪成等候判刑嘅白花油王子顏福偉登場。
福仔佔主場之利
福仔嘅背景同EDC有啲似，都係鍾意唱歌嘅有錢仔，但兩個人出嚟道歉，效果就有啲出入，八方不妨同大家比較一下。首先講吓個地點，EDC揀喺九龍灣展貿，福仔就索性喺白花油嘅灣仔office，後者既慳錢又有主場之利，算係贏人少少。不過，論矚目程度，雖然福仔單案連日嚟都被傳媒大篇幅報道，但同EDC道歉當日，吸引到成300個本地同海外記者嚟採訪，福仔只係得大約30個本地傳媒畀面咋，輸咗成十條街。
衣着方面，兩位都以恤衫、牛仔褲作為道歉look，算係打個和。至於道歉稿嘅內容，EDC全程以流利英語讀出，仲先後用咗十次道歉嘅字眼，顯示咗佢讀番書嘅外語底子同進軍荷李活嘅英語水平。但八方認為，道歉最緊要係誠意，福仔五次起身鞠躬呢個肢體語言，算係稍勝。
EDC講稿後台勁
除咗台前嘅主角，幕後班底都好緊要，EDC當日份道歉稿，聽講由城中知名大狀過目，其間有黑白雙煞外籍保鑣護駕，開完記者會返屋企，仲有成200個PTU築成人肉鎖鏈，幫佢封路護駕，真係巴之閉。反觀福仔，只係由𠵱家做緊顧問公司嘅無綫前主播李燦榮幫佢call記者，之後亦係由佢傍住去攞車，氣勢方面差好遠。八方個人認為，福仔可以兵行險着，開完記者會大大方方咁走去搭的士，睇吓啲司機會唔會同佢握手言和，咁就冇得頂喇。
mailto:[email protected]
顏陳道歉記者會大比拼
-顏福偉-
時間長度：3分42秒
道歉look（不計樣貌）：牛仔褲、暗花直條白恤衫--《和》
道歉方式：共鞠躬五次--《贏》
語言：夾雜廣東話、英語--《和》
記者人數：約30人，本地傳媒為主
護駕陣容：前新聞王子李燦榮陪同到停車場攞車
-陳冠希-
時間長度：約6分鐘--《贏》
道歉look（不計樣貌）：牛仔褲、直條恤衫、黑色西裝褸--《和》
道歉方式：聲明先後用咗十次道歉字眼
語言：全程流利英語--《和》
記者人數：約300人，本地及海外傳媒--《贏》
護駕陣容：200名警察圍成人鏈、封路擋記者--《贏》