醫生救人就救得多，救校就真係冇乜試過。本身係無國界醫生義工嘅聖母醫院外科部主管兼副行政總監歐耀佳，噚日就連同多位名醫，齊齊返去位於東頭村嘅母校福德學校，反對教育局以母校收生不足為由要殺校。
福德學校可謂醫生搖籃，噚日200幾名校友、師生同家長參加家教會舉辦嘅家長申訴大會，除咗歐醫生，瑪嘉烈醫院化學病理學顧問醫生陳恩和、醫管局感染及應急事務高級行政經理朱明都返嚟齊齊唱校歌、綁紫絲帶救校。其他醫學界校友仲有屯門醫院急症部主管甘澤等等。
回憶少時攞救濟品
歐醫生話，佢同陳恩和醫生以前都住喺城寨附近，窮苦人家出身，細時有返學校攞救濟品，老師又好，大家對學校都有份情。陳醫生亦話，當年佢讀木工科，啓發到佢對科學嘅興趣，中學升讀工業學校，讀生物、化學，之後就決定讀醫。歐醫生同陳恩和嘅細佬陳恩強醫生係同學，仲每年爭考第一㖭。
福德學校計劃申請特別視學，畀教育局嚟睇吓佢哋嘅教學質素，唔好因為收生少一、兩人就將佢哋殺死。