呢排師奶最熱門嘅話題，離唔開V太情慾奇案，同埋消委會踢爆自稱「最抵」嘅大型超巿，其實係超貴巿場。啱啱收到姊妹Grace嘅email，佢好勞氣話超市根本係搶錢，佢話有好多生活必需品、食物都貴過街市、藥房同士多。
Grace話，佢經常去街巿同超巿格價，超巿真係乜都貴過人，雞翼街巿兩磅賣24元，超巿用kg計，每kg35至40元，心水清啲，1kg即係2.2磅，即係貴過街巿至少46%。就算係超巿大鑼大鼓話減價，啲價錢都貴過街巿，好似廚師腸街巿每包賣7.5至8元，超巿減價都賣成12至14元一包，四海魚蛋街巿賣7.5元，超巿減價賣12至14元，真係離譜。
佢仲話，有時都唔明點解啲人屋企附近有街巿，都要去超巿買，可能俾佢哋嘅廣告影響啦。佢話自己寧願嘥啲時間行遠啲，都去街巿買餸。小妹聽到有啲汗顏，自己好多時貪方便去超巿一次過買晒啲嘢，𠵱家通脹時期，都係改壞習慣，花多啲時間格清楚價格先買嘢。
逢周一至周四刊出