梁振英自從講過第Ｎ屆都唔會選特首之後，好多人信以為真，點知最近振英哥改變口風，講到話要睇「天時地利」，當堂令政壇人士精神為之一振，認為會有好戲睇，假如振英哥真係決心一戰，熱門人物如唐司長、曾司長，甚至葉太（如果佢今年九月入到立法會嘅話）等人，都要打醒精神！講完天時地利之後，呢輪振英哥又話自己會在五月二號做火炬手，又發言支持最低工資立法，好矚目啫，咁多嘢講，好難話唔係爭取曝光率，爭取民望噃。
到銀行家會所吃午飯，碰到一位政界消息人士在座，佢話最低工資立法，為兩個工種而設，就係保安與清潔工，會訂立最低工資，但不為工時設限，甚有彈性，相信老闆必會明白政府用心良苦，唔會反對。左丁山儍儍哋問：「是否勢在必行呀？」消息人士話：「勞工處早有一套詳細方案，只要政府高層拍板，就可交畀立法會討論通過，唔使等好耐啫。振英哥挑通眼眉，聰明絕頂，豈會不知。睇番歷史，史太林遲遲不向日本宣戰，與日本維持若干關係，美國一粒原子彈擲落日本之後，史太林立即向日本宣戰，出兵去中國東北霸中國土地，根本係不戰而勝，佔盡便宜。」
哦，聰明人做事，真係可以事半功倍，唔到你唔服。但政府使唔使出番個諮詢報告，問吓意見呀？消息人士講：「話都冇咁易。我啲AO朋友最識寫報告，隨時寫三百頁，長到你冇心機睇。」咁又係，左丁山以前在銀行工作，老闆命令memo不可長過三張紙，否則退回不看，左丁山經過幾年「訓練」，寫報告最多寫十頁八頁就寫不下去，硬係唔明白點解啲AO有咁多墨水，隨時可以寫出一百頁嘅報告。後來問一位退休AO，佢話自入政府，已經學寫，到咗佢成為高官之後，手下有十幾名AO，一聲令下，每人寫十幾二十頁，已經有二百幾頁，佢負責總其成，加頭加尾，於是三百頁報告，唾手可得，至於有冇人詳細睇，係另一回事。退休AO又話：「他日有副局長、局長助理，由外間空降，不熟悉政府部門運作，睇報告都睇死佢哋，寫又會寫到佢哋煩。呢類所謂高薪厚職，唔易啃㗎！」