燙手聖火傳到香港，政府如臨大敵，查實使鬼花過千警力兼出動埋飛虎隊咩？計我話只要揸得實碌火炬，就邊個都搶唔到啦，戴番對防跣防腐蝕性液體嘅膠手套咪掂檔囉。今日我幫埋政府做手套測試，結論估佢唔到，最醜嗰對手套，反而最掂喎。
記者：許維雅
攝影：林栢鈞
模特兒：Kinki、阿豪
意見提供：港專家務助理服務（31946016）
專家之言
先聽專家意見，教家務助理清潔嘅港專職訓課程策劃主任連Sir話：「用得最多的確係黑色工業用膠手套，因為保護性最強，有防強酸、防強鹼功能，由於只得黑色唔美觀，所以較少家庭主婦會用。一般超市買到嘅彩色絨裡手套，內裡厚身吸濕力強有助吸手汗，最適合手部敏感人士。至於選擇尺碼，最緊要緊貼手形，令手指靈活方便工作，不過記得保持衞生，浴室同廚房手套必須分開兩對用，建議買唔同顏色方便識別。」講真，握火炬只係搞Gag，不過唔理你係家務男定家務女，懶戴手套分分鐘有主婦手，以下7個參賽者價格差別唔大，外形又對對一樣，點揀？睇完以下三個測試，斷估你都識揀嘞啩？
參賽手套一覽
測試一 防滑度
洗潔精滑潺潺，拎重碗碟易跣手，所以手套表面多數有特別壓紋防滑。測試方法好簡單，模特兒Kinki先唧洗潔精落雪糕筒表面，阿豪負責戴手套嘗試抱起雪糕筒，睇邊對手套最唔跣手。
1.★★★
2.★★
3.★★★★
4.★★★★
5.★★
6.★★★★★
7.★
結果：6號唔受洗潔精影響，阿豪緊握雪糕筒底部無向上捋，7號勁跣手，阿豪直頭攞唔起雪糕筒。
測試二 柔韌度
唔同手套有唔同柔韌度，柔韌度越高又直接增加雙手活動靈活度。橫掂洗碗碟經常接觸到刀刀叉叉，第二個測試就用圓頭餐刀拮住手套向下拉，睇吓邊款手套拉得最長。
1.★★★
2.★★★★
3.★★★★
4.★
5.★★
6.★★★★★
7.★★★
結果：6號一拉遮到半把刀；5號毫無彈性，好彩唔係一拮即穿；4號欠柔韌度，膠料不能回彈，留下明顯刀痕。
測試三 防腐力
家居清潔經常接觸腐蝕性液體，通渠通廁，免不了一對手套。第三個測試測防腐力，將所有手套放入加有大量哥士的嘅水盆，雖然起晒泡，但浸10分鐘變化始終唔大，等阿豪淋上強力通渠液，終於有結果嘞。
1.★★★
2.★★★
3.★★★
4.★★★★
5.★★★★★勝
6.★★★★★勝
7.★★★
結果：浸完哥士的，所有手套都無腐爛穿窿迹象，防腐力總算有保證。不過淋上通渠液後，除5號同6號絲毫無損外，其他手套立刻脫色，2號更現出啡黃鐵銹色。
總結
只賣$5，原來被一眾師奶認定最醜樣嘅工業用手套最強，我覺得醜唔醜樣無所謂，最緊要實用，買番對看門口無衰。
a.惠康（北角英皇道238號康澤花園地舖/25716421）
b.日本城（天后清風街100號地舖/25707178）
c.昌發五金（土瓜灣譚公道87號地舖/27118087）