性感女子組合Freeze三位成員石詠莉、甄穎珊同陳樂榣，前晚又到尖沙嘴某酒吧演出，三人依舊着到鬼咁性感，石詠莉着黑色露背tubedress；甄穎珊以金色露背裝加熱褲上陣；陳樂榣就以低V裝上陣露出乳溝，最性感最搶鏡。
加價不愁客路
現場有近80位酒客捧場，其中大部份都係男士，反應熱烈。陳樂榣上台時笑笑口話：「我哋係Freeze，唔係HotCha。」三人即載歌載舞，大玩拗腰，陳樂榣彎身時乳溝盡現，谷胸上陣嘅石詠莉就跳到tubedress下滑，露出後面肉色bra帶，真係睇到啲酒客金睛火眼！陳樂榣話好多酒吧搵佢哋演出，佢話：「我哋係咁加價，加咗幾倍，但依然長做長有。」加價後會唔會再性感啲？佢哋就話冇被人要求更加性感，但就指明要佢哋唱《金睛火眼》。
除咗酒吧之外，私人生日派對同學校都請佢哋表演，咁會唔會收起性感？陳樂榣笑笑口話：「唔鍾意性感就搵另外三個（指HotCha）！」另外，Freeze透露蕭定一會開一套講愛情同驚慄嘅電影畀佢哋拍，題材有啲似《神探俏嬌娃》，問到對男主角要求？三個都異口同聲話：「要求夠高，唔靚仔唔拍！」
