內地股市跌唔停，昨日繼續插水，港股仍然好難唔受影響，恒指能夠只跌61點收市，都係要拜成交淡靜所賜，話就話成交增加咗，仲係未夠800億，繼續當橫行格局睇。
前晚花旗股市仍然反反覆覆，道指升1點，急升之後保住唔跌，已經幾好，話晒嗰邊仲係「立立亂」，不過，幾個主要指數嘅走勢圖都顯示，阻力開始增加，睇嚟最快昨晚就會見到淡友反攻。
美股大戶偏向造好
花旗嗰邊啲企業繼續公佈業績，啱啱公佈業績嘅美林連蝕三季，次按影響仲未過去，不過市場反應唔算大，睇嚟大戶造好嘅意願都幾強，聯儲局議息之前，道指應該守得住12200關口，短線嘅波幅應該喺12300至12700。
至於內地股市就仲係淡友主導，散戶已經輸到儍咗，主觀願望就係中央救市，但個市就話畀自己聽會繼續跌，情緒好悲觀，由於仲未有期指市場做對冲，所以少咗挾淡倉呢瓣幫手，所以短期內好難翻身，呢排內地股市對港股嘅影響會大過花旗股市。
港股短期波動區會喺23400至25000之間，強勢股唔多，暫時睇都係得隻中移動（941）頂住個市，公用股亦唔係隻隻咁穩陣。
中電C輪9137：中電（002）昨收64.50元，逆市升近1巴仙，算係唔錯，周線圖呈突破，短線睇上試68元，破位睇71元，可以諗吓隻中電C輪9137，昨收89仙，有效槓桿率4.6倍，正股升上71元，9137會見1.34元，正股跌穿61元，沽出隻輪止蝕。