梁洛施（Isabella）前日正式入稟法院，指當年與英皇簽署的合約不公平，要求法庭宣判合約無效。同屬英皇的洪卓立謂覺得公司抽佣合理；對於Isabella被雪藏時，經理人霍汶希要求她向老闆楊受成求情，鍾舒漫則謂若自己工作上做錯了事，她是有責任跟老闆道歉。
梁洛施前日正式入稟法院控告英皇，指當年簽署的合約不公平，當中包括抽佣過高，要求法庭頒令判雙方所簽的合約無效。又指英皇要求她作出合約以外的不合理行為，令她對公司失去信心。同屬英皇娛樂的關智斌（Kenny）昨日出席「饑饉30」，談到Isabella的合約官司，他說：「嘩，仲快過風球，乜嘢係違背自己額外工作嘅定義？我唔可以推測乜嘢事，總之由法律判決。」
盼以和為貴
問Kenny有否聽聞Isabella年前被雪藏時，經理人霍汶希叫她向楊受成求情，Kenny稱不知情。對於Isabella表示簽下不合理合約，他說：「合約上寫嘢唔可以透露，有保密協議，每個人對合理定義一時一樣，有啲人𠵱家覺得合理，之後又覺得唔合理。」對於Isabella被斥反骨，Kenny則說：「講到Isabella反唔反骨，我就不願置評，我係小角色，我對佢嘅忠告係萬事有商量，以和為貴。」
另一英皇歌手鍾舒漫昨日在荃灣出席活動時說：「我嘅合約係好合理，都有畀律師睇，加入公司後，冇試過做一啲工作以外嘅嘢，唔覺得唔舒服同唔開心。至於同老闆道歉，我覺得如果係我工作上出現問題，做錯事或者失場，係有責任要同老闆道歉，係應該做嘅事。」
「得佢一個講」
洪卓立則希望紛爭能早日平息，他說：「作為朋友，我會祝福佢，呢件事係Isabella嘅決定。我就唔會咁做，會同公司慢慢傾，公司抽佣合理，因為公司投資好多錢落我身上。」問他入稟狀中提及合約以外的不合理行為，他說：「佢講啫，唔舒服嘅定義可以好多，可能好少嘢都覺得違背自己，𠵱家得Isabella一個講，總之合約係雙方同意先簽。」
周麗淇則說：「對於未經證實新聞唔講，以前我做模特兒比較幸運，如果有令自己唔舒服嘅job，會sayno。」
此外，黃貫中（Paul）談到Isabella的官司時說：「一丁點感覺同漣漪都冇，因為唔關我事，委屈同違背係好廣泛，我試過入行一日要換七件衫已經好委屈，以前Beyond都曾經有合約糾紛，拆得掂咪自己拆，唔好益律師。」對於入稟狀所指的不合理行為，梁詠琪說：「我做新人時，媽咪都睇過份約，作為新人，份約係合情合理，公司都冇迫我做唔合理嘅嘢。」
採訪：李珮洳
攝影：陳志嵐
