噚日八方披露聖雅各小學上午校小五常識科，出咗條考起程翔嘅選擇題，校長張勇邦噚日來電八方，指噚日朝早，有個自稱係《蘋果》記者嘅李先生，打電話去學校搵佢，當時校長唔喺度，呢位自稱李先生質問書記小姐，「程翔犯咗乜罪？」八方都講過，呢條問題程翔都唔識答，書記小姐當堂口啞啞，要求李先生留電話，等校長稍後回覆，不過呢位李先生只肯留低八方個電郵地址。
張校長之後向八方查詢，《蘋果》係咪有位姓李嘅記者搵佢，定係八方有事查詢。八方了解後，確定噚日冇同事搵過校長，八方本人亦冇，相信有人對該校出條政治選擇題不滿，冒八方之姓搵校長質詢。八方嚴正澄清，呢位李先生係冒牌貨，任何人對呢份小學常識測驗卷有意見，可以直接向校方反映，唔好亂入八方數。