資深體育新聞主播伍晃榮病逝，好多人都好傷感，無數人喺網上留言悼念伍晃榮，哀傷嘅網民可能被淚水蒙蔽咗眼睛，竟然鬧出一場「點錯相」風波，非常黑色幽默。
上Blog留言哀悼
伍晃榮去世當晚，網民即時熱烈討論佢嘅成就，懷念佢風采，好多網民去到一個名為「伍晃榮」嘅Blog表示哀悼，「永遠懷念你」、「restinpeace」等留言如潮水湧至，喺一片愁雲慘霧中，版主忽然online，話自己唔係伍晃榮，大家唔好當佢死人辦！
突然傳來伍晃榮逝世消息，網民已經好難接受，轉頭有個「伍晃榮」話自己未死，嚇到大家呆晒，一時間唔知點反應。版主澄清，話自己其實係伍晃榮fans，過去多年一直以「伍晃榮」做網名，想唔到真正嘅伍晃榮逝世，不知情者以為佢個Blog係伍晃榮官方網誌，搞出個大頭佛。
網友知道真相後不忿被「假伍晃榮」騙去真感情，喺Blog留言洩憤，批評版主「死人都拎嚟玩」，據網主講，幾日間有幾千人點錯佢相，硬食幾千隻死貓，「自出娘胎以嚟，都未試過遇上咁嘅事……呢一刻，自己都唔知應該點形容心情。」為免風波鬧大，佢將網名改為「伍晃」。「伍晃」真人不露相，自稱係填詞人，性格剛愎自用，只會閉門造車。