運輸及房屋局噚日公佈最新嘅一手私人住宅供應數據，但政府新聞處喺網上發放嘅新聞稿竟然話，今年首季一手私人住宅施工量同落成量都係97年以嚟新低，認真嚇人，連電台新聞都集中呢點嚟講，點估到政府竟然會蝦碌。
政府應市場訴求，喺04年先將各部門嘅住宅供應數據，集中由房屋局每季公佈一次，增加市場透明度，點解今次數據突然可以追溯到97年？八方向有關部門查證後，原來係政府搞錯，新聞處知道搞錯後，快手快腳喺下晝4、5點更正網上版本，不過又做漏嘢，因為新聞稿雖然已經刪除「97年以來新低」字眼，但圖表說明就竟然只係刪咗「按年下降73%」一句，而「是97年以來的新低」呢個錯誤就冇刪除，錯誤繼續獻世。