台灣總統大選期間，電視上出現一個廣告，一把男聲扮陳水扁講：「我沒有打拼經濟！沒有……經濟不知何時才會好。」另一把男聲扮馬英九話：「馬上就會好」。此乃朋友轉述，左丁山冇睇過，記憶可能有誤，但「馬上就會好」呢句punchline錯不了。馬上可解為（一）即時，（二）馬英九上，如馬上扁下。諗出呢一句嘅廣告創作人好有想頭，而「馬上就會好」呢個廣告吸引到好多選民留意。
呢日在醫院輪候，有好多人喺前面，碰到幾位朋友，輪流握手，俾好耐冇見過嘅中學女同學笑：「喺醫院做公關咩？」自己都為之失笑，事先點估到有幾位朋友一齊在醫院碰頭呀，尤其是中學女同學㖭。女同學陪老公到醫院，佢老公係大馬主，我哋養馬係「細藝」，佢養馬係做生意，在澳洲有兩隻「種馬」，已配種生產咗兩百隻馬。然後又碰到金牌經紀Ｍ女士，經紀Ｍ捉住左丁山就鬧：「叫咗你買台灣股，你又唔睬我，抵你死，升咗好多嘞！」
唉吔，邊度有咁多錢周圍買股票呀？經紀Ｍ話：「我哋喺台灣嘅公司一早博一鋪，博馬英九贏，結果贏晒，馬先生贏咗大選，我哋贏咗股票，果然係馬上就會好。」聽見呢句「馬上就會好」，於是問佢隻廣告出自何方名家手筆，竟然產生宣傳作用。經紀Ｍ故作神秘：「我知都唔話畀你聽。話得畀你聽嘅就係買台灣股，買陽明山大屋，最醒目嘅人叫做肥佬黎，一早在台北內湖買咗兩萬坪，呢勻實賺到笑，佢老人家會肥到縛唔到鞋帶。」
肥佬黎愈嚟愈肥，關我哋乜事吖，叫經紀Ｍ請食飯，佢話第日先，第二日佢就與老公飛往巴黎行街，嘆番幾日。M老公視巴黎如故鄉，得閒就飛過去行吓，吸收啲國際氣味，佢一個星期留在台北四日苦幹，有空就要去巴黎唞唞氣嘅嘞。與經紀Ｍ傾完，老牌大馬主Ｃ要同左丁山握手，令後輩左丁山受寵若驚。馬主Ｃ初做馬主時，左丁山仲係小學生，豈敢高攀吖。不過馬主Ｃ素來富而有禮，言行謙虛，於是又傾幾句，等前輩擺錢入我袋。