議員年復一年就預算案內容辯論係例行公事，一般市民唔會留意，連官員都聽到悶，好多局長象徵式現身立法會當交差就鬆人，連發表「處男」預算案嘅財爺鬍鬚曾都唔例外。可能佢信心十足自己份「功課」會高票通過，所以冇乜心機留守立法會拉票。
議員轟唔尊重議會
多位議員喺噚日立法會內務委員會會議上，輪流炮轟鬍鬚曾唔尊重議會，聽聞主席范太都高度關注。馬丁更提出大膽建議，話要押後下星期表決預算案，以行動向政府表態，等禮賓府知道議員幾咁唔妥鬍鬚曾。馬丁呢個咁「激」嘅建議，得唔到同僚支持，連泛民主派都冇聲援，保皇黨當然話唔好，更指押後通過預算案，可能影響發放額外生果金、免差餉等利民措施。馬丁唔再選唔志在選票，其他人仲要拉票，唔可以陪你玩。
最終大家拗完一輪，決定先由內會主席劉健儀，下星期一同政務司司長唐英年會面時反映意見，明篤鬍鬚曾背脊。議員有口話人，都係金勞詹心水清，佢好不屑咁話，其實好多議員都有開小差，政黨鬧人前反省吓先啦。