油價屢創歷史高位又如何？石油股表現卻乏善足陳。以往油價每升至關鍵大位，例如升破每桶50美元、80美元之類，石油股都將跟隨炒上；不過，今年再用以往慣技來跟炒石油股，卻敗興而返居多。
中石油A股（601857）上市5個月後，終難逃跌穿招股價命運，挨近16元人民幣收市，H股（857）又怎能獨善其身，一插就穿10元，跌2.7%，報9.82元。
產品議價能力強
內地股市又大散，滬綜指數收報3094點，不但創近13個月以來新低，亦係自96年來表現最差的一周，與去年10月底高位相比，累計已跌49%。股海哀鴻聲中仍期待中央會出手救市，但前陣子A50中國基金（2823）買盤急增，至今估計應已有不少人「中伏」，若然A股反彈無力或救市措施只係空中樓閣的話，勢引發止蝕盤蜂擁而出，有貨在手者宜留神。
人人都想股市轉旺，不妨望望半新股中國旺旺（151）。旺旺係內地最大米果及兒童奶品生產商，雖然去年生產成本上漲，但據里昂份報告所指，旺旺已提升售價逾6%，反映其產品有較佳議價能力。旺旺近期股價於2.80元至3元範圍橫行，基本上尚未大炒過，頂位無謂估，可訂2.50元止蝕短炒。