廉署總部舊年由金鐘搬到北角，新屋入伙本應可喜可賀，不過廉政專員湯顯明卻坐得唔係幾安樂，唔係風水唔好，而係廉署搬新竇後，貪污舉報應聲大幅下跌，單係今年首季，收到嘅貪污舉報只有600幾宗，較去年同期大幅下跌兩成半。
廉署分析後，相信唔係因為新總部風水好，令香港貪污問題好轉，而係可能同市民唔係好知廉署已搬總部有關。湯專員指廉署座落金鐘30幾年，市民想舉報好知碇，北角新總部相對之下較隔涉，而且年頭多公眾假期，素來係舉報淡季，佢估計下半年數字會回升。湯專員可能驚廉署調查員太清閒冇事忙，所以呼籲市民唔好嫌新總部吊腳，其實市民都可以去廉署地區辦事處，或打熱線25266366舉報。