味丹（2317）業績靚爆鏡，6厘高息，但股價仲喺上市以嚟低位，單係呢個point，已經抵炒。味丹係全東南亞最大味精生產商，07年度（12月底止）營業額近25億港銀，絕對唔嘢少。而年度純利就翻半番到1.3億銀，兼全年派息4.3港仙，PE8倍，息率講緊6厘，數據吸引到痹。
呢期原料漲價，但味丹喺第一季，已經將產品提價4、5%，去keep住毛利率；加埋集團嘅規模優勢，生意無憂。保守計數，味丹08年度純利，係咁意增長20%到1.56億港銀，PE跌到6字頭單位數。
又家陣越南係味丹最大收益貢獻地區，年收益上10億港紙。呢期越南大熱，成為外資新寵，越南經濟大旺，味丹前景更上層樓。味丹本月頭先創出0.59元上市以嚟新低，現價0.71元，仲係殘到痹。買味丹，以08年度10倍PE做目標，講緊要升43%見1蚊雞。
玖源食正糧價急升
玖源（8042）07年度（12月底止）純利升咗45%到4140萬銀（人仔．下同），已經夠省鏡。家陣環球糧食價格急升，刺激農產耕作，好似玖源呢類化肥企業，食正呢潮大浪，嚟緊日子，仲肥仔。玖源08、09年度，係咁意keep住30%增長，純利上到5380萬銀及6996萬銀，連埋配股效應計，09年度PE都係12倍。以15倍PE做目標，玖源要升24%到0.22元，而玖源呢個目標PE，相對環球同業，仲係平到爆。