無綫最近鍾意安排一班青春少艾宣傳奧運，吸引多啲人注意嘛，噚日無綫就喺尖沙嘴日航酒店舉行「TVB超級合作夥伴」記者會，搵嚟應屆香港小姐張嘉兒同周美欣，以及幾位青春女藝員包括以性感做招徠嘅「咪神」徐淑敏，仲有啱啱加入性感行列嘅楊秀惠，雖然佢哋今次性感欠奉，但就個個T恤短褲，活力十足。
不滿縮短聖火路程
楊秀惠都唔輸蝕大騷長腿，佢話：「今日我扮足球員，似唔似呀？我最近學人買波，第一次贏1,000蚊，第二次就輸番，我係買曼聯贏嘅。」現場即刻有人話畀楊秀惠知，曼聯最近冇輸過波，佢聽到之後好愕然咁話：「係？我個朋友呃我！」
徐淑敏就話知道香港傳送聖火嘅路程會縮短，佢話：「好失望，原本嗰條路線會經過我屋企，𠵱家可能要特登出去睇。」