伍晃榮人緣甚佳，曾跟他合作的藝人如鍾志光、韓毓霞和林敏驄等，對其去世均感惋惜，韓毓霞昨日與鍾志光出席無綫奧運節目記者會，提到與伍晃榮的難忘事迹時一度鼻子一酸，她說：「佢係不可多得嘅人才，喺體育界評術反應好快，而且最鍾意幫人，有一次我去珠海書院教書，伍晃榮跟我車，大家研究教書話題，點知佢真係跟咗我去上堂，第一句仲同學生講『唔好貪小便宜，我就係貪小便宜就嚟咗呢度上堂。』當時令到學生上咗好開心一課。」
鍾志光表示06年和伍晃榮合作主持世界盃最難忘，他說：「當時佢要做一個《伍晃榮日誌》，啲稿要佢親自寫，佢返公司有好獨特嘅要求，就係上天台自己寫稿，佢覺得環境位置好配合，呢份係佢嘅執着。」
無綫綜藝及體育科監製李漢源則表示，前日在伍晃榮身邊陪他最後一程，李漢源知道他周一才遊船河返港，短短幾日病情急轉直下，記者問伍晃榮有沒有遺願時，李漢源感慨說：「我諗佢都係想做奧運啦。」
林敏驄：我跣咗佢一鑊
林敏驄昨日出席活動時說：「真係人生無常，佢份人好好笑好幽默，不過上次我都跣咗佢一鑊。我本來想話佢有霍金嘅智慧，點知佢反應好快咁扮咗個樣出嚟，嗰次之後我同佢齊齊俾人話，不過睇得出佢份人都好玩得。」
採訪、攝影：卓寶花