疑似騷！疑似失準嘅畢傑喺〈英超早飛王〉暫時功成身退，由疑似精通英超嘅藍鑽石串演〈早飛王〉，一於追住季尾疑似放水嘅熱刺唔放。禮拜六韋根主場對熱刺，平手盤韋根早捧早着，呢樣就真係冇懷疑嘞。
藍鑽石
我話熱刺疑似放水，熱刺躉大可放心，並唔係指你哋愛隊造波，只係隊波贏完英聯盃後，今季基本上冇目標。放水，可以係刻意嗰隻，亦可以係唔在乎嗰隻，熱刺肯定屬於後者。
熱刺近6場得1勝
有「績」可尋，熱刺近6場聯賽只係贏過一場咁大把，上場都要靠對方烏龍球至同米杜士堡言和。早排仲起勢入波嘅羅比堅尼，近期無影無蹤，而貝碧托夫亦唔好得去邊，據講佢同會方傾續約傾唔掂，走硬，仲鬼會同你搏！不過正因為咁，熱刺畀到好多歡笑對家捧場客，簡直係歡樂大使，呢場「疑似放水騷」，早啲「對號入座」。
韋根留級領隊獎金肥
講到韋根，呢隊波禮拜一應該令好多人輸錢，賽前有邊個估到佢哋可以作客車路士攞到1分？韋根家陣有35分，比尾3嘅保頓多6分，唔可以話已經身處安全島，仲要搏命，假如呢場贏埋就真係好安全。英國幾份小報都話只要韋根唔使降班，領隊布魯士會得到200萬鎊（約3,040萬港元）獎金，熱刺兵無理由阻人發達啩？
除咗仲要爭取護級，韋根近5場主場聯賽不敗兼唔失波，只要呢場對熱刺都唔失球，即可平球會喺1978年所造出嘅連續6場主場不失球紀錄，而布魯士近期成日提住呢場波，睇嚟都真係對平紀錄呢單嘢好重視。上場對車路士，韋根可能預咗輸，所以本來停賽刑滿復出嘅古馬斯、米高布朗都無踢正選，今場先去盡。
早飛王貼士
星期六16韋根vs熱刺
首選：韋根（平）
次選：韋根主/主（4.1）
冷選：韋根勝2:0（9.5）
周末早飛超級重心
-英超-
阿仙奴打雷「主勝」穩
星期六12
阿仙奴vs雷丁 4:1（13倍）
周六英超頭場可能已經係一場大屠殺。兵工廠久沉，近兩個月5場主場比賽竟然未贏過，急須爭勝向球迷交代，尹佩斯將會夥拍艾廸巴約掛帥。雷丁近3場都食白果，上場對富咸時有捷克兵馬廸祖夫斯基復出，一樣無起色捧蛋，真係無得救，雷丁領隊列圖話想喺阿聯酋球場贏波，得啖笑，越攻得急輸得越甘，今場值得插「主勝」。
米堡風流波捧「客勝」
星期六14
米杜士堡vs保頓 1:1（6.5倍）
米杜士堡同熱刺一樣，基本上已經漫無目標，惟獨對強隊先至嚟料；保頓護級戰意高昂，不過上場對韋斯咸攻入全場唯一入球嘅奇雲戴維斯本來都要停賽，加埋佢整親隻手，隨時提早收「咧」，搵邊個入波好？呢場波博保頓成功搶分開「客勝」之餘，諗定過「細」波膽應該都無衰。補充埋數據，兩軍近年交手成日和，要埋和波仲得。
維拉勢演阿「伯」殺手
星期日10
阿士東維拉vs伯明翰 2:1（7.5倍）
假如你禮拜日未諗到節目，呢場當日本港7點開波，隨時天都未黑晒嘅英超汁都可以撈埋。話晒打吡戰，應該係激戰。主隊阿士東維拉因傷唞咗3場嘅格力加特拿話紮住都要踢，令右閘多一個選擇。講到底，今季美爾保甚至李奧曲卡打呢個位效果都麻麻。伯明翰勢危想搶分，但客績衰到咁，又有戴文莊臣停賽，屬力戰僅敗格局。