英冠尚餘3周，爭升班越嚟越刺激，仍堅持追旺唔追弱，形露端倪，呢段時期冇得靠「符碌」。熱選尾場「3哥」史篤城W，在主場兩萬多觀眾助威下，殺低「4哥」布里斯托城（球賽編號：星期六47；無綫收費電視998台及now898台明日0:20am直播），次選冷博水晶宮作客贏屈福特。
史篤城上仗作客「地頭蟲」高雲地利，竟能在半場落後下反勝2:1，實力與運氣兼備，並一掃前仗爆大冷主場負水晶宮嘅烏氣；雖然贏波代價係右後衞兼隊長格芬拉傷，要提早收「咧」，而從紐記借用嘅貴價射手艾美奧比受傷上陣成疑，但前者老退速度減，後者入球能力極低，以目前該隊主力陣容，實足夠在餘下3場爭全勝（餘下兩仗對手只是下游嘅高雲地利及李斯特城），直升上超聯。
只准2,500布軍球迷入場
今場對手奇兵布里斯托城在關鍵時期已轉弱，作客更4戰不勝失掉10分；其實以該隊實力，根本無法在超聯生存，打比郡的例子前車可鑑，升班決心令筆者有懷疑，上仗主場與狼隊互交白卷勁勢全無。另外，據報史篤城今場為營造壓倒性氣勢，只准許對手2,500名球迷入場打氣，比原本少一半，可以話為直升，乜招都出齊。
敲阿仙奴[4]、[5]球
次選水晶宮亦是季尾越走越勁，更剛與表現優異嘅門神史巴朗尼續約3年，軍心大振，其他戰將那有不拼盡博續長約之理。上次已說過，水晶宮目標明確，保住第6位打附加賽；反觀表現飄忽嘅屈福特，上仗守和西布朗已算夠運，近11戰僅錄得1勝，前線位位欠銳，要讓波非常不值博。
另外博大霧，已無緣爭霸嘅阿仙奴同雷丁鬥攻開4球、5球，阿仙奴上兩屆去到季尾後，皆會放開懷抱同對手鬥攻。
近5場往績：輸輸贏贏輸
蘋果波神
今季唔得，咪下季嚟過囉！