近日政界出現好多「疑似」奧運聖火火炬手，人人內心「恨」做又唔敢認，俾人話擁有特權事小，上綱上線將奧運同政治拉上關係就大件事。相比之下，根正苗紅嘅民政事務局德成局長好老實，開到口直認自己好「恨」做火炬手，比起想跑第一棒、又推推讓讓嘅煲呔大方得多。
噚日模擬聖火傳送求其測試，德成局長有讚冇彈，話過程好順利。有人問佢最近有冇練吓跑，一聽到個「跑」字，德成局長即刻心領神會，笑到仇家陳太四萬咁口，話自己冇練跑，但隨即補番句：「我好想跑呀，近排冇乜做運動。」德成局長應該自知冇份接火炬先咁風騷，可見有啲嘢，「恨」得到都未必好㗎。