AudiTTRoadster2.0TFSISTronic<br>Show前預演火紅TT　大開色戒

AudiTTRoadster2.0TFSISTronic
Show前預演火紅TT　大開色戒

劉美君今晚紅館開Show，演唱會主題玩大開色戒，有幾色就未知，只知擺咗架從未曝光嘅火紅TTRoadster上舞台，想像到劉美君會勁玩Lighting，紅爆觀眾為止！呢架開篷版TT認真矜貴，代理從不肯借出拍攝，只預定喺紅館首度曝光，《Car通》今番截君姐糊見街，唔知佢會否唱《我估不到》時零舍咬牙切齒呢？

記者：梁美甜
攝影：林栢鈞
模特兒：Enrica

■軟篷紅跑，古典又經典。

■車速喺時速50公里以下，行住開篷都得。

■開住篷嘅Roadster更有超跑嘅辣味。

「掠過尖東一帶，霓虹裏它飛得快」

新TT最引人注目絕對係佢嘅性能，唔容易見但可以Feel得到，仲係非常強烈㖭！新車用上2.0TFSI引擎搭配STronic波箱，STronic即外間所謂嘅DSG波箱，擁有雙離合器，可以在最快最平穩嘅情況之下轉波，近排聽人講話自動波快過棍波，指嘅就係呢類高性能技術嘞！
新一代TTRoadster外裝變動其實唔係好多，只係車身線條設計更流線統一同流露強烈肌肉感，驟眼睇仲有啲似R8同A5㖭！新車主要以提高性能為前提，車身用咗好多鋁合金，加強剛性，抗扭度據講比上一代增強咗120%。換句話說，操控反應更敏捷及震動更少，行車更平穩！Roadster唔開篷就浪費佢嘅吸引力，㩒個掣就喺12秒內以Z形自動開合，型爆！

■唔係人人都可以同火紅Roadster一樣型得起㗎！

■2.0公升容量唔算大，加埋FSI、Turbo同STronic波箱，馬力高達200匹，勁！

■直路加速快，車廂仲又靜又定，「超級」唔係部部車都叫得。

「今夜就要玩玩，否則活着太簡單」

TT絕對係Audi旗下紅牌之一，佢嘅「紅」指嘅唔單止係受歡迎程度，同時係佢呢一身嘅火紅色調。全新TTRoadster，若非用上火紅色，嗰份震撼一定無咁強烈，事關話到明係2.0TFSI引擎，用上燃油噴注配渦輪增壓連Turbo，早就知佢實力有幾強，2.0公升輸出馬力高達200匹，加埋Audi出名強嘅高性能及操控性，從來都唔會對佢嘅實力有所懷疑。不過第一眼見到呢部火辣辣嘅紅跑，都依然驚艷，更感到佢嘅強悍同吸引，眾人目光都被佢凝住。