噚日運輸及房屋局公佈香港首季私人住宅施工量只有300伙，較舊年第四季4900伙大跌94%，不過消息未有為地產股帶嚟刺激。專家認為，本地地產股動力越嚟越弱，反觀內房股已跌唔少，值博率更高。
玲：楊慧玲 碩：黃敏碩
玲：今季住宅單位施工量只有300個，比之前少咗好多，市場擔心樓市供應會有斷層，地產股會唔會有影響？
碩：地產股表現就睇唔到有影響，但消息對地產股推動力越嚟越弱，最實際始終睇番現有樓盤銷售量。反而𠵱家內房股值博率仲大，雖然驚嚇度亦較高，但喺人民幣升值同資產值折讓下，論爆炸力，內房股始終強啲。
玲：咁低嘅施工量暫時雖然話冇問題，但政府喺勾地政策上好似配合唔到，供應越嚟越少會唔會扯高樓價？
碩：唔可以否定有呢個可能，但都要睇市民購買力同買樓意欲，外圍環境唔明朗，對香港樓市始終有啲影響。
玲：之前好多讀者都話入咗長實（001）但表現麻麻，長實主席李嘉誠近期又增持，趁消息換馬好唔好？
碩：其實可以趁反彈走咗先，論條件中資股已經回落好多，博反彈中資股會好啲。
玲：主席增持股份有樣好，佢哋都入貨可以令大家放心啲。
沽民安換馬國壽
梁先生：舊年10月買咗民安保險（1389），3.5蚊入咗啲，跌到3蚊再溝貨，𠵱家得番1.57蚊，點算好？
玲：民安保險走勢每下愈況，上番3蚊比較難。
碩：你要定止蝕先，佢做一般保險，冇做壽險，近年先開拓內地業務，內地業務遠遠不及另外三保，同國壽（2628）、平保（2318）更冇得比。其實可以考慮1.6至1.8蚊先行套現，再換馬去國壽。佢市盈率落番去19倍，跌到現水平，用佢去博收復失地機會大。民安靠內部增長上番3蚊有啲難度，反而國壽去番合理價32蚊應該有空間。
屯門梁先生個案
買入價：3.5元
目標價：-
止蝕價：-
時期：半年
財險有微利即走
關公：其實本身都冇諗住入貨，不過聽四五六叔講個市見底，忍唔住6.5蚊加咗注財險（2328），雖然佢業績唔好，但係覺得抵買，睇佢有機會彈番上7蚊。
玲：財險真係比較大上大落，首季A股咁波動，佢嘅基本因素係咪冇咁好？
碩：市場最唔鍾意非常突然嘅壞消息，問題係佢核心營運可能有虧損，交強險價格始終受內地控制，之前炒佢會做多啲財險以外業務，但一直只聞樓梯響。
關：我覺得佢再跌空間有限，升番有啲微利就走，都唔係等佢上番8、9蚊。
大埔關公個案
買入價：6.5元
目標價：7元
止蝕價：-
時期：-
歡迎Click入 http://finance.appledaily.com以Webcam參與節目及收看
每日收市後4:30pm
亦可Phonein28698262暢談心得
請即登上 https://video.appledaily.com.hk/realtime/features細閱詳情
下星期一嘉賓：
