人民幣持續對美元升值，即係話港紙入到內地，越來越唔見使，同五年前比較，相信人民幣兌港幣已升值十五巴仙。以前到深圳用一百蚊港紙，可得一百零幾人民幣，現在只得回八十九左右。邊啲人最受影響呢？我哋成班人坐埋食飯大發牙痕，投資M話：「我哋在大陸有唔少投資，簽合約時，全以美元計，現在慘嘞，因人民幣升值，如果唔加碼，按照原來美元數目，根本埋唔到欄。」中貿L話：「貿易好難做，中國製造貨品以美元計，日日貴一啲，美國買家唔肯加價嘅話，我哋中間人好難捱。此外，我有好多老友駐北京、上海，佢哋話以港幣支薪夠慘情，加埋內地通脹嘅話，等於八折支薪，慘過○三年時減薪一成！」
對基層生活知得比較多嘅藥王T就講：「你哋班人都叫做有錢嚟捱吖，頂多呻到樹葉落，但不傷脾胃。幾年前有人倡議退休長者，或攞綜援人士返回內地居住，真係入咗去嘅長者與綜援人士先至最杰，豬肉貴，米貴，麵包貴，港紙在內地唔見使，問你點辦！」冷不提防律師H加一句：「好呀，或者有意想不到後果，一啲七十歲老人家唔會夠錢入去娶個二十歲四川小姐，香港會減少一啲家庭問題！」
人民幣持續升值，影響好多商人、投資者與普通人嘅辦事方式與生活，大家要識得調整、調節。好多人一於每日轉港紙做人民幣存款，每日兩萬人民幣，希望賺息又賺滙。但做人民幣存款，提款每日有上限，亦係兩萬，到真係要大筆錢用之時，好麻煩。心水清嘅外滙C同左丁山講：「有早知，冇乞兒，人人講人民幣升值，以為人民幣係強勢貨幣，其實不然。人民幣似好強，其實係美元太弱至真。以人民幣/歐元計，其實貶咗值，歐盟國家駐華官員以歐元支薪，根本上八年來都加薪（以人民幣計）。2001年，一歐元約等於七蚊人民幣，現在超過十一蚊人民幣，即係話在2001年，你不斷存歐元，今日你就係大贏家，存英鎊，澳元，紐元，加元亦然。而且存外滙全無限制，好過存人民幣多多聲！」一言驚醒夢中人，好彩自己儍儍哋一早開咗紐元戶口啫。