極爆《GTA4》!唔夠打要報皇

極爆《GTA4》!唔夠打要報皇

一向崇尚「殺人放火金腰帶」嘅《GTA》系列,嚟緊會喺新世代主機PS3同XB360同步推出《GTA4》!畫面更靚、槍械火力更強、開槍下下見紅呢啲例行公事,就點都唔少得㗎喇,不過最搞笑、最估唔到嘅終極武器,竟然唔係機關槍或者火箭炮,係大家人手一部嘅手提電話!點用?報「皇氣」拉晒啲敵對派系咪得囉!正所謂「敵人嘅敵人就係自己嘅朋友」,估唔到打機都啱用!

撰文:福田

兇狠移民入侵罪惡城

完全崇尚「真實」暴力同罪惡嘅《GTA》,基本集集主題都差唔多,唔係黑幫新仔博紮職、就係江湖中人慘被屈;呢次《GTA4》亦差無幾,名叫Niko嘅三十來歲東歐新移民,踏足九反之地LibertyCity(取自紐約與新澤西嘅混合體),目的係實現表弟口中經常自誇嘅抱洋妞、養番狗嘅奢華生活。後來見到吹水表弟嘅慘況,仲俾人係咁追長命債,Niko為咗出人頭地於是拿起槍枝做大賊,實行以牙還牙、以眼還眼。

■諗唔到唐人活躍地帶,居然會有間「MK茶記」咁搞鬼。

■為咗消滅證據,打劫完當然要燒車,唔通博差人拉咩。

■冧完友!就咁走?事後當然有手尾跟啦!

劇力逼人火力更猛

遊戲進入新世代平台,舊《GTA3》圖象引擎當然唔夠用啦!開發人員早就整咗個RAGE新引擎,務求令以前單薄嘅遊戲背景空間感大增。不過更大改進係Load碟,只要開Game嗰下Load完,喺遊戲入面幾乎做到零讀碟,同以前入間屋都要等,簡直天淵之別;今集槍械明顯亦較重火力,甚麼手槍、輕機槍、狙擊槍、火箭炮等,全部都做出「火光拖尾」嘅物理質感,回憶以前舊版槍械,感覺簡直係慘不忍睹嘅BB彈!
雖然玩家火力加強了,但當然你有機關槍時,人哋隨時有成支軍隊同你搏命,因此若有需要就要借助今集新加嘅手提電話,叫差人嚟拉晒班麻煩友,甚至叫火燭車或救護車嚟搞亂檔,連電話都玩埋問你服未?

■爆到九彩咁都炸你唔死,對方肯定大難臨頭。

■終極武器出場:反坦克火箭炮!你估係《Biohazard》咩?

■強調黑吃黑、靠支槍講惡,都係《GTA》系列一貫特色。

趣味花臣有增無減

《GTA》系列一向以「自由行」見稱,所以無論你駕車、行路甚至坐快艇,都可以走勻整個區域。儘管過往奉行任務制、必須完成指定劇情任務先可以令故事繼續推進,今次則寬鬆些少,進一步將副線任務同劇情任務拉近,務求做到唔會一方面搵暗殺目標,一方面又周圍去搵小包裹咁不三不四,使人更能全情投入到遊戲世界裏面。此外當然唔少得幾有心思嘅小遊戲如掟飛鏢等,將美式地下夜生活盡量展現大家眼前,唔使擔心去到哈林黑人區冇命走,都可以大概體會得到。

■打打殺殺嘅嘢做得多都悶,惟有藉掟飛標呢啲益智活動調劑吓。

■置身牆角搵適當時機走去突擊,係今集新增嘅特色操作。

■除咗駕駛私家車之外,仲可以坐喺電單車後座同人挑機。

首度引入群毆網戰

鑑於新操作平台都有網絡對應能力,好多人引頸以待嘅多人網上對戰玩法,今集《GTA4》終於得到實現,仲容許最多16人同時參與,令更多同好者可以融入呢個犯罪世界裏面。同好多FPS嘅連線模式相似,除咗互抽玩家亦可合作執行特定任務,甚至係兵捉賊等,部份更會定下排名,啱晒鍾意演嘢俾人睇自己打機有幾叻嘅人。

機種:PS3、XB360
廠商:Rockstar
類型:動作
人數:1人(網上16人)
日期:4月29日
價格:約$445(PS3)$368(XB360)