陳敏之工作接踵而至，努力工作多年，當然希望事業更上一層樓，並謂最開心是最近跟兩位偶像劉松仁和陳玉蓮合作拍攝無綫新劇《原來愛上賊》。不過，踏入高清年代，敏之臉上卻長了濕疹，令她困擾不已，幸好看完中醫後已慢慢康復。
陳敏之近日除了主持無綫節目《事必關己》外，早前更與劉松仁和陳玉蓮合作拍攝無綫新劇《原來愛上賊》，難得跟兩位偶像前輩合作，雖然沒有太多同場機會，但她也不敢怠慢，敏之日前說：「細個成日睇佢哋，特別係陳玉蓮真係keep得好好，皮膚好靚，我真係冇諗過可以同佢哋合作。」
敏之在劇中飾演馬德鐘的妹妹，性格跟現實中的她有少許相似，問她演繹上可有困難？她說：「呢個角色唔係太難，有少少似自己，好爽直同男仔頭，感覺比以前嘅角色成熟，我都好開心，可以畀觀眾睇到自己已經長大，冇以前咁任性。」
盼出唱片
08年對陳敏之來說，是非常充實的一年，除了拍劇外，也有機會擔任主持，唱歌出身的她最大心願仍然是出唱片，問她可覺得遺憾？她說：「都唔係遺憾，只係一個未完成嘅夢，希望將來有機會實現到，但𠵱家做主持都好開心，因為學到好多嘢，又訓練到口才同記性。」
早前敏之臉部長了濕疹，令她心情一度低落，幸好經中醫調理後已康復，她說：「之前真係好唔開心，因為咁啱又開始高清廣播，始終女仔都想以最佳姿態出鏡，而且當時公司幫我哋拍咗段高清片，仲播咗出街，但嗰段片我𠵱家都未睇，因為唔敢睇。」
儲錢買樓
問敏之是否感到壓力？她說：「以前壓力大好多，𠵱家細佬讀完書出嚟做嘢，我係家中最大嘅，Daddy又過咗身，所以變咗家中支柱，嗰時壓力最大，𠵱家負擔冇以前咁重，所以會儲錢買樓投資，希望將來屋企人過得更加安穩。」
採訪：王崇穎 攝影：陳志嵐
化妝：MAEVON
髮型：DYofHairCulture
服裝提供：Sin囗quanone
