資深體育新聞主播伍晃榮，因白血病感染肺炎，引至器官衰竭，昨日傍晚6時35分病逝於瑪嘉烈醫院，享年67歲。伍晃榮生前為人風趣健談，故同事喜稱呼他為「伍Sir」，不少圈中好友悉其死訊後均表可惜，其三十年好友、年前飽受喪妻之痛的林尚義（阿叔），慨嘆未能見伍晃榮最後一面，並悲嘆「人生就係咁」。 採訪：林妃
阿叔：有病真係好攞命
林尚義與伍晃榮在06年合作主持世界盃，對於好友病逝，他萬分感慨地說：「唉！我本來諗住去探佢，點知見唔到佢最後一面，人生就係咁，我太太之前有肝病，有病真係好攞命。伍晃榮係一個好盡責嘅人，每次開廠佢都早到做好準備，我同佢合作世界盃好開心。」阿叔又長嘆一聲說：「佢又唔戒口，佢一向有糖尿病，去年我見過陳尚來，佢話畀我知伍晃榮入咗醫院，都幾嚴重，係糖尿病引起併發症，真係可惜，冇法啦！」阿叔又講到自己的近況，他說：「我已經戒咗煙同酒，我氣管有事要日日食藥，有時會行公園做吓運動咁啦。」
楊千嬅：用心教電視配音
「聽到呢個噩耗，真係覺得好突然，我同伍晃榮曾經合作過一次配音（圖），當時佢知我對電視配音唔係咁有經驗，好用心教我，所以經過呢次合作，我覺得佢好好人。其實未合作之前，我已經好鍾意佢報體育節目嘅幽默風格，如果稍為留意吓佢報道體育節目時嘅用語，真係會覺得好抵死，佢嘅死係觀眾嘅損失，希望佢嘅家人可以節哀。」
楊婉儀：令體育新聞精采
「同伍晃榮一齊做奧運節目，雖然大家做唔同時段，但收工放工見到面都會打招呼，佢好nice，喺新聞界好有知名度，好有經驗，真係好可惜。佢令到體育新聞更加精采，好風趣，好幽默，唔似喺度讀緊稿。佢用啲好有趣嘅術語講，令人聽咗好開心，佢好有創意，佢嘅報道手法已經成為佢嘅招牌。」
林敏驄：佢好幽默好風趣
「我啱啱喺電視機度睇到，我聽完之後覺得好難過同惋惜，我最難忘係同佢合作主持世界盃，我覺得佢人好好，好幽默同好風趣，之後我哋仲交換咗電話，但後來因為大家太忙，所以一直都冇機會聯絡，真係好可惜！」
方力申：錄影片段待回味
「我同伍晃榮冇合作過，但嗰時佢負責報道體育新聞，咁我當年又係代表港隊出去游水參加比賽（圖），咁我會錄咗有關自己新聞報道，當中都有佢負責報道。佢可以話係陪伴香港人成長，所以聽到佢離世都覺得好可惜。」
葉翠翠：細細個睇佢報道
「伍Sir嘅死訊好震撼，記得06年同佢一齊做過世界盃節目（圖），我好欣賞佢嘅執生技巧，佢個腦真係好靈活，轉數又快，佢嘅離世，對新聞從業員嚟講係一大可惜。我好記得細細個睇無綫新聞就聽到佢報道完後，報上自己個名，呢句說話好入腦，佢講嘢好流暢，地位又高，真係一位出色嘅前輩。」
如煙往事：以柔濟剛寬恕阿叔
伍晃榮與林尚義（阿叔）相識30載，兩人同獲無綫邀請主持2006年世界盃，一齊宣傳時也開開心心（圖）。其中一晚節目播出伍晃榮的私人showtime「伍晃榮日誌」環節後，阿叔忽然揶揄他，言論更過了火位，因而引起廣泛討論，後來林尚義為過火言論補鑊。事後伍晃榮接受港台節目訪問，稱已原諒了阿叔：「（我）原諒佢嘅年紀，原諒佢未經大腦，如果我又係咁衝動，第二日全部娛樂版都係伍晃榮。」
生活軼事：小賭怡情過日辰
-難忘出國-
伍晃榮首次出國是1964年的事，當時24歲、任職體育記者的他採訪東京舉行的奧運會，他說：「嗰次係我第一次出門，又係第一次搭飛機，居然開心到三晚瞓唔着。」
-做過領隊-
講波出色的伍晃榮，也做過領隊。當年商台老闆何佐芝成立佳視，欲以電視台名義進軍甲組，於是委派伍晃榮組足球隊參加比賽。伍晃榮表示球隊人腳不俗，曾申請升上丙組，可惜未能通過。隨着佳視結業，球隊也跟着解散。
-酷愛賭馬-
伍晃榮一向鍾情賭馬，但只是小賭怡情，多數是5串10（即10注），每注20元，全日投注才200元。他曾表示1976年訪問過騎師告東尼，更向對方索取貼士，可惜全數皆輸。
-最怕教書-
伍晃榮於2002年曾執教珠海書院一年，不過他猛呻教書辛苦，他說：「報道新聞只講幾分鐘，教書要企喺度講足個半小時，講到口水亁。」
資料來源：《蘋果》資料室
