立法會營養標籤附例小組委員會噚日首次開會，政府卒之放下心頭大石，事關佢哋屬意嘅陳智思，有驚無險以11票對10票，以一票之微擊敗自由黨張宇人當選主席。
八方噚日講過自由黨好「恨」做呢個委員會主席，所以「班馬」投票，更成功游說卿姐、李國麟支持，如無意外張宇人夠票叫糊，因為同陳智思各有11票，要抽籤定奪，不過偏偏自由黨自己友脫腳，梁劉柔芬竟然冇到，令張宇人飲恨而回。
立法會小道消息稱，梁劉柔芬一直冇乜興趣加入呢個委員會，最終亦證明勉強真係冇幸福，張宇人衰喺黨友手上，唔知有冇得怨人。梁劉柔芬助理幫老闆澄清，強調梁太因事離港，唔係刻意缺席幫政府一把。講就咁講，個黨接唔接受解釋就唔知嘞。