睇上期〈頑石點頭〉，將石兄專欄嘅每一粒字咀嚼，雖然最後伯明翰開唔到大，但得到呢位好友力撐，眼淚水都射出幾滴。畢傑嘅眼淚一向係射出嚟嘅，除咗石兄嘅用字感動外，另一原因係我個仔〈早飛王〉暫時易主。唔使講嘢，石兄上次撐我一千分大，今次我喺擂台撐夠你千二分韋根平手！夠老友喇啩？
今日係聖Jo舊生聯賽嘅收「咧」戰，我隊波Campione雖然已經攞咗冠軍，贏輸都冇乜所謂，但晏晝我都會幫佢哋踢兩場比賽，實行捧吓盃開心吓。夜晚就同導演麒、曾國祥同周浚偉幾位朋友踢吓衞生波，一日踢三場，畢傑肯定會好攰。
不過喺未攰之前，我一早度好今期嘅推介，都係揀番地盤西甲場次，啱啱喺西盃決賽落敗嘅基達菲仲有機會降班，贏榜尾利雲特冇問題。
讓球：基達菲（上）
心得：基達菲贏埋上岸
近5場往績：輸輸贏輸輸
畢傑
就算朗拿度點沉淪，我依然最愛呢個死肥仔；聖西路小天地唔啱你，請過祖記。