因「車震」事件一度被雪藏的梁榮忠，前晚擔任舞台劇頒獎禮的司儀，甫見「老闆」無綫總經理陳志雲，不忘在台上擦鞋一番，陳志雲取笑他不照稿讀，而另一位司儀杜雯惠則狂寸忠仔，令他露出尷尬神色，惟有以笑遮醜！
前晚在中環大會堂舉行的「第十七屆香港舞台劇獎頒獎禮」，由梁榮忠、杜雯惠及劉雅麗擔任司儀，當晚請來不少頒獎嘉賓，包括劉青雲、郭羨妮、劉心悠及關心妍（Jade）等，當忠仔介紹「老闆」陳志雲出場頒發「傑出年青演員」時，他即說：「佢係我老闆，要隆而重之。」
「雪番佢入雪櫃」
忠仔問陳志雲對舞台劇獎項的睇法，他表示：「做得好電視演員，未必做得好舞台劇演員，但做得好舞台劇演員，就乜都可以做得好。」忠仔即擦鞋地說：「聽君一席話，勝過十年書。」陳志雲聞言笑說：「稿裏面你唔係問呢個問題，我記住你！」在旁杜雯惠笑言：「咁雪番佢入雪櫃。」忠仔即表現得很尷尬，以笑遮醜。
青雲負責頒發「最佳男主角（悲劇/正劇）」給鍾景輝，他笑言：「你哋就好，有兩個男主角，分悲劇同喜劇。」雖然在香港電影金像獎敗給李連杰，但青雲獲不少網友支持，他坦言很開心，亦覺得李連杰實至名歸。至於好友毛舜筠未能得到女主角獎，青雲謂：「我當佢攞咗，遲早問題。」另外，朱克得到「終身成就獎」，全場起立拍掌祝賀他。
願穿內衣褲演出
郭羨妮當晚穿戴數萬元低胸吊帶裙和珠寶盛裝出席，搶盡風頭。郭羨妮表示去年曾和馬浚偉合演舞台劇《王子復仇記》，她希望再有機會演出，問會否介意大膽性感演出？郭羨妮稱：「如果只着內衣褲都OK，睇身形弗唔弗，有美感可以接受，但就唔講粗口，因唔想破壞港姐形象。」
此外，昨日有周刊指青雲因為心臟出事，令老婆郭藹明生仔夢碎，又拍得青雲去過著名心臟科專家謝德富的醫務所，記者昨日就此事致電青雲助手阿May，她說：「我已經同青雲了解過呢件事，早排佢因為要做例行檢查，所以就上咗去中建做檢查，其實嗰層係謝德富醫生同幾位醫生一齊開嘅醫療中心，青雲並唔係睇謝醫生，佢心臟根本冇事，生唔生仔根本同呢啲嘢無關。」
採訪：駱華齡 攝影：陳慧安
