玩具大王細女蔡加怡做執董嘅香港體檢（397），噚日用過百萬銀，搵雙料視后佘詩曼做代言人，點知見唔到Crystal之餘，另一執董曹貴子都冇現身。華華問副主席李植悅，為乜兩個執董齊齊唔見人？
李植悅答話，好多人將香港體檢同埋阿媽康健國際（8138）混淆，所以管理層決定，Crystal同曹貴子做阿媽嘅發言人，阿仔嘅發言人就交由主席馮耀棠、李植悅，同埋首席執行總監曹貴宜（曹貴子阿哥）負責。李植悅仲同華華爆料，話曹貴子其實有嚟㗎，但就匿埋唔現身，以正視聽！
佢又話，進軍內地市場後，先知內地人驗身同香港有好大差別，好似驗血同照X光呢啲醫療項目，阿爺都有價格管制，價錢約係香港嘅25%至50%。另外，內地啲廠好興成班員工一齊去驗身，一嚟就兩三車人，十足小學生。而畀得起幾千蚊人仔驗身嘅算係貴客，一定要求獨立貴賓房，所以佢哋特別間多幾個VIP房，以免待慢大客！