上個禮拜同事才子結婚，平時超怕熱嘅同事文文，着咗條紫紅色麻質嘅吊帶短裙去飲，仲好醒咁加咗個淡紫色tubetop打底防走光，啲同事平時見慣佢返工個「賣魚look」，都讚佢嗰日着得好睇，𠱁到佢鬼咁開心，周圍捉住啲人影相，又擺出港女招牌V字手勢，好鬼風騷。
過咗幾日，個衰妹好緊張咁打電話嚟畀我，話當晚揸住部單鏡反光機狂影佢相嘅同事郁郁，鹹鹹濕濕好鬼馬同佢講：「唔知點解影到你條裙變咗透視呀，真係唔好意思嘞。我send返啲相畀你睇。」文文話即刻返屋企睇吓自己部機影啲相有冇事啦，發現全部用咗閃燈嘅相都影到佢條裙變咗seethrough，「上身有tubetop打底都透唔晒，下身就現晒形。最慘出咗事都唔知點解。」
姊妹不明不白蝕晒底，小妹打畀時裝設計師夏嘉懋問個究竟。佢話麻質布料係好易透㗎，特別係影相嘅時候就更加易出事。佢教路，着麻質衫唔想走光，可以喺入面着啲polyester做嘅底裙，「不過要揀啲好薄、好軟熟嘅質料，唔係就會影響咗麻質衫嘅質感，無咗飄逸嘅感覺。」佢又話，最穩陣嘅顏色係白色唔係肉色，着咗之後，唔單止可防走光，條麻質裙都唔會咁易皺。
逢周一至周四刊出