以前嘅日製跑車，當地法例所限，馬力輸出大都限於280匹，搞到班車迷要出盡法寶加大馬力去增強性能。但隨住呢個規限取消，車廠推出新車嗰陣都刻意加大馬力。今日喺香港登場嘅新一代SubaruImprezaWRXSTI，馬力亦提升至300匹！日前，我就直踩獅城，喺TurfCity附近，駕着這300匹馬力肆意狂飆！
記者、攝影：鄭達基
動力增嚇怕對手
今次係兩年內第三次為咗SubaruImpreza到新加坡，感覺上次數多咗啲，但今次卻係最興奮嘅一次，事關係試揸期待已久嘅新一代ImprezaWRXSTI！興奮嘅原因好簡單，因為新車終於打破咗最高馬力只能達280匹嘅限制，喺廠方嘅精心調校下，容積為2.5公升嘅水平對向四汽缸Turbo引擎，最大馬力輸出急升20匹至300匹，而扭力亦增加1.5kgm至41.5kgm，單睇數據肯定已經令班Fans拍手叫好，亦令一眾同級對手汗顏！
輕踩油門推住去
好喇，係時候跳上駕駛席踩盡油跑一轉，試吓係咪真係強過以前好多！即使試車路線只係圍繞TurfCity走，但有齊直路同彎路，大可以試盡部車喺唔同路面情況下嘅表現。首先個人覺得6前速手波嘅操控比上代容易，至少「極力子」唔會太重，就算似我一樣好耐無揸棍波車嘅人，都可以好輕鬆咁操控。其次係馬力加大咗嘅2.5Turbo引擎果真聲威力猛，輕踏油門已經有一股強勁嘅推背感，加上新加嘅斜路起動系統，令到呢部手波車喺斜路起步都唔會溜後。一套AWD四驅系統，亦令部車喺濕路上有唔錯循迹表現。講真，貪玩嘅我就梗係不停調校SI-Drive系統，務求可以試吓喺唔同引擎輸出模式下嘅反應。最愛就梗係SportSharp模式啦，因為可以用盡馬力同扭力輸出嘛！另外，DCCD系統都可以作手動或自動調校，想考驗自己駕駛技術嘅朋友，大可以手動調校嚟增減中央差速器嘅介入。
裝身變型格跑手
經過半小時嘅車程，終於嚟到位於TurfCity嘅新車發佈會場地，多部全新ImprezaWRXSTI喺眼前出現，嗰一剎那真係好想可以快啲跳上駕駛席，嚟一次踩盡油狂奔……
不過，試車前當然要先欣賞吓呢位新一代跑手嘅雄姿，同其他新Impreza一樣改用咗揭背設計，但就加裝咗一系列由STI提供嘅車身部件。例如有整流裝置嘅頭尾泵把、頂置定翼，同埋新款18吋STI超輕合金胎軨等，從而令呢部原本外表溫馴嘅旅行家，忽然化身成一位剽悍嘅長跑好手！不過車廂方面嘅改動就唔太多，只係換咗前座做STI嘅跑車桶椅、三幅式跑車軚環同錶板，感覺似乎普通咗啲。若然你都有同感，大可效法呢部用作拍攝嘅新車咁，額外加裝一系列可顯示油溫、水溫等資料嘅儀錶。
新車速蘋
讚：
．2.5公升Turbo偈，馬力突破規限達300匹！
．一身STI提供嘅跑車包圍，令造型更具霸氣。
彈：
．除STI桶椅跟軚盤，車廂陳設稍欠跑味。
．僅揭背版本供選擇，或未能滿足部份車迷要求。
供款幫你計
首期：$35,900
利率：5%
年期：48期
每月供款：約$8,078
註：以上數據僅供參考
規格
引擎：2,457c.c.水平對向四汽缸配Turbo
馬力：300ps/6,000rpm
扭力：41.5kgm/4,000rpm
傳動：6前速手波，四輪驅動
尺碼：4,415X1,795X1,475mm
軸距：2,625mm
車重：1,505kg
查詢：MotorImage（25112727）
Cody玩甩尾娛賓
今次喺新加坡舉行嘅新一代SubaruImprezaWRXSTI發佈會，大會除請嚟東南亞同香港等地嘅傳媒出席外，亦請來MotorImageRallyTeam嘅車手Cody同Rifat表演一場甩尾Show，向大家展示佢哋嘅實力。雖然去年曾成為Cody戰車嘅座上客，親身感受過佢精湛嘅駕駛技術，但今次仍不得不再給他掌聲以示支持呢！
