聞到焦燶味，衝入廚房為時已晚，貪過癮煎雞蛋煎出個大頭佛，無得食已經慘，最弊係俾阿媽喪鬧，要自己洗番靚隻鑊，呢啲咪名副其實嘅大鑊囉。是日阿媽教路，百潔布、鋼絲綿定鋼絲球省鑊最掂？睇嘢啦。
記者：洪偉順
攝影：王文忠
模特兒：Song@StagesModel
煲熱洗潔精洗鑊
要洗靚隻鑊，有時擦到手斷都未必搞得掂，阿媽教快捷簡單方法如下：「倒洗潔精同水入鑊煮10分鐘。」，你無睇錯我無寫錯，真係煮熱呢鑊洗潔精水，洗潔精遇熱會加快分解燒焦物質，之後熄火浸一陣，話之你用乜工具洗鑊，起迹效果都事半功倍，幾難搞嘅肉屑都會Easygo。我有問題，用嚟洗鑊嘅呢一塊塊、一球球同一嚿嚿嘅嘢，究竟點稱呼呢？阿媽話：「無特定點叫，總之就係百潔布、鋼絲綿同鋼絲球啦，呢啲嘢個個阿媽都應份識啦。」是日測試簡簡單單，測試潔鑊能力同本身易唔易洗得番亁淨，你估邊隻最勁？
思高百潔布$12.2
阿媽話：「勁喎，輕輕一擦就起到好多迹，擦多兩下隻鑊已經立立令，手感都唔錯，唯一缺點係薄咗啲，得1cm厚，力度難集中。」包裝寫明話有防刮清潔粒子，結合柔韌纖維，有效清除污迹又唔會刮花器皿表層喎。（a）
去污力（★★★★★）：
超強勁，徹底去除黑色燒燶斑點。
易潔度（★★★★★）：
冲水，捽都唔使點捽，即刻變番靚仔。
思高鋼絲球$8.3
阿媽話：「上一輩最鍾意用嘅省鑊用具，好勁㗎，不過要小心啲囉，我次次用親都刮損手。」鋼絲球外表幾樣衰吓，同埋好易變形。（a）
去污力（★★★★★）：
一流，焦燶斑點一擦就ByeBye。
易潔度（★★★）：
冲水，肉眼睇好似好亁淨，摸上手成隻手黑晒。
PowerSPONGE$6
阿媽話：「玫瑰紅顏色好吸引，市面上好少見，不過潔鑊能力一般啲囉。」擦唔甩幾多污迹，洗完剩低好多污水，吸濕力好一般。（b）
去污力（★★）：
弱，要勁出力擦先Work囉。
易潔度（★★）：
講真，狂捽塊綿都仲係好污穢。
japanhome鋼絲綿$10
阿媽話：「呢款超抵用，一包有6件鋼絲綿，以價錢嚟講好抵。」計我話銀色鋼絲綿，襟污穢就真。（a）
去污力（★）：
擦極都仲有小量黑色污迹，唔多掂。
易潔度（★★★★）：
冲水洗得甩，望落幾亁淨。
微力達百潔布$3
阿媽話：「都係嗰句，太薄，得1cm厚，始終難用力，好影響洗鑊效果。」我試過，擦極都甩唔晒啲焦燶嘢，斷估唔會因為我未食飯啩？（b）
去污力（★）：
三個字，好唔掂。
易潔度（★★★★）：
用手捽多兩嘢就亁淨番晒。
Iindo百潔布$3
阿媽話：「最鍾意呢款，夠實用，我會買。」雙面用，一面係洗鑊用百潔布，一面係洗碗用普通海綿，果然係師奶，識揀。（b）
去污力（★★★★★）：
擦完立立令，就知係勁嘢。
易潔度（★★）：
可能吸力太強，留喺上面嘅污穢嘢洗唔甩。
a.日本城
（北角渣華道92-94號地舖/21041569）
b.雙喜百貨
（北角渣華道19號A地舖/25717709）