鄭希怡（Yumiko）和洪卓立近日忙於宣傳今日上映的電影《愛情萬歲》，二人在戲中上演姊弟戀。前晚，他們「拍拖」亮相《蘋果》網站直播節目《娛樂開CHAT》。問到Yumiko和洪卓立可會接受姊弟戀？洪卓立說：「只要大家心智一樣，同年長嘅女伴相處開心就可以。」Yumiko也不介意與年紀小的男生拍拖，假若對方需要金錢資助進修，她更願意賺錢「貼仔」，她說：「我對於錢銀上唔係太着重，只要個男仔有上進心，我唔介意喺錢銀上支持佢讀書！」大家可登入《蘋果》網站 http://ent.appledaily.com隨時重溫節目。
採訪：懷鈺 攝影：仇志中
獨立初期最難捱 阿奶
阿奶：入行咁多年有邊一年最難捱、最辛苦？
Yumiko：我諗係03、04年（編按：鄭希怡脫離3T行列，獨立發展階段），因為嗰排係做乜嘢都唔順利，做乜嘢都好難得到回報，我諗嗰排係辛苦啲嘅，但跟住又開心番啲。
阿奶：睇雜誌知你嚟緊又會出國語碟，廣東碟又會點呢？
Yumiko：啱啱出咗隻廣東碟啦，嚟緊會錄國語碟嘅，預九月會出啦，年尾呢就好貪心，想出多一隻廣東碟嘅，希望趕得切。
盼做癲佬考演技 北角阿瑤
阿瑤：我想問你入行以嚟有冇趣事發生過？
洪卓立：其實每一日都有趣事發生，每一日都好開心咁過，除咗出碟嗰排大壓力啦，其餘都好開心，所以好難答到你噃。
阿瑤：如果下次拍戲，你想做乜嘢角色呀？
洪卓立：我想做一啲性格分裂，癲癲哋嘅角色，因為做戲就係要做一啲同自己好唔同嘅角色，我想試吓做精神分裂嘅角色，呢頭同你笑，轉個頭會喊嗰啲角色囉。
版主：凌零發
