投資推廣署署長盧維思呢幾日人在法國，當然唔係去睇聖火傳遞，因為巴黎早就傳完啦，佢此行目的係去招商，本來冇乜好講，之不過好揀唔揀，揀正呢個時候──中法兩地因為人權問題變得緊張，中國網民仲吹晒雞話要抵制法國貨，呢個咁敏感嘅時間去咁敏感嘅地方，仲想做show吸水？唔止timing錯晒，就連運都冇埋，睇嚟米老鼠安排行程之前，唔識查通勝之餘亦唔識睇時勢！
孖住深圳副市長同行
話說中法近排外交關係認真麻麻，唔少法國政客，就連總統薩爾科齊都開晒聲，話中國唔重視人權，有可能杯葛京奧開幕禮；連串言論搞到中國同胞好唔高興，甚至有網友喺網上呼籲大家5月1號擺去法國企業家樂福買嘢，話因為路易威登（LV）似乎有份資助西藏精神領袖達賴喇嘛，而LV係家樂福大股東。
不過就連網民都意見分歧，有網友回應話，中國持有嘅美國國債規模世界第二，可以話係美國第二大股東，咁係咪話美國打咗伊拉克，阿拉伯國家嘅人都應該抵制中國呢？總之呢排中法關係大家拗到臉紅耳熱之際，你反而走去法國，叫人到中國投資同擴展業務？米老鼠都幾反高潮。
話說今次推廣會，盧維思其實唔係一支公行單咇，而係孖住深圳市副市長卓欽銳一齊，帶住廿幾個中港官員同商家一齊去，喺個研討會上簡介港深投資環境，唱好兩個城市有幾咁吸引，都引咗近二百個法國企業嘅高層出席個研討會，至於有冇LV旗下公司嘅高層，又或者有冇人喺會場外抗議，就要問米老鼠先知。
電郵：mailto:[email protected]