入到馬場，例牌將手機轉向「震機」，守足馬會規矩。以前馬場唔准開手機，後來順應時代轉變，順應民情，准入場馬迷在看台打電話，但要用「震機」，可惜呢，唔少馬迷唔守規矩，廂房內仍然不時聽到電話響聲與大聲講電話，騷擾他人。唐人唔係好識尊重別人，唔識尊重寧靜，講電話仲特別大聲過人㖭，相比之下，日本人科技進步，用手機不會落後於香港，但人哋在火車、巴士、公共場所都禁用手機講電話，打短訊則無妨，真係有禮貌得多。
星期六在馬場，第四場過後，手機震動，原來係馬主Ｎ傳來短訊，叫上六樓飲香檳，佢哋隻團體馬四場一號「中華英雄」力壓「中國陸家」，贏咗頭馬，馬會送一枝香檳，佢哋好似訂多兩枝，成班老友飲得好高興，獨係唔見咗成員之一馬主Ｌ與編輯Ｂ，編輯Ｂ出外公幹，冇得好講，印刷Ｌ就次次入場都冇香檳飲，偏偏兩次唔到場，就兩次（連埋呢次）都贏頭馬，班團體成員都戥佢可惜。今年係奧運年，到處講中國，呢日第四場跑出「中華英雄」搭「中國陸家」，第十場又跑出「中國心」，由𠵱家到季尾，對呢類馬名或者要特別注意。
高興之餘，竟然迎面碰到奧運馬術公司總裁林煥光。林總裁話佢平時極少入場，是日為咗陪朋友，特別入場觀戰。馬術與賽馬雖然係兩回事，方式完全唔同，但碰啱香港馬會大力支持奧運馬術，提供世界一流馬術比賽場地及設施，於是在香港特別環境下，賽馬與馬術有密切關係，呢日馬會在廂房內放置大量印刷精美嘅小冊子──「香港──馬運之都」（HongKong---TheEquineCapital），有中英文版本，任攞唔嬲，左丁山立即攞咗兩套，馬都唔刨，刨吓呢本「香港──馬運之都」先，此小冊子全彩色印刷，編排醒目，圖片清晰，內容主要介紹香港奧運馬術場地，場地之地質結構，空調馬房，馬房廢料循環再造，綠色奧運，減低天氣對馬匹和選手的影響，奧運馬術比賽項目及日程等，十分豐富，想認識奧運馬術，呢本小冊子係好好嘅入門讀物。