在娛樂圈工作的女藝人，個個都怕肥，偏偏組合at17的成員林二汶卻大唱反調，天生肥妹仔的她認為肥胖不是罪過，更自豪胖胖的身形為她營造出可愛形象。
二汶近日推出漫畫文集《肥妹與脂脂肪肪》，她前晚亮相《蘋果》網站直播節目《娛樂開CHAT》，鼓勵肥人不應自卑，她說：「可能我自細都冇瘦過，屋企對我喺呢方面教育得好好，肥都可以係可愛嘅人。」對於已故開心果沈殿霞（肥肥）的愛女鄭欣宜的身形經常被批評，二汶卻識英雄重英雄，她力撐欣宜：「我睇過佢細個一次表演，身手好靈活，又有節奏感。」二汶不希望大家只把焦點放在她的身形，要留意欣宜音樂上的才華。大家可以登入《蘋果》網站 http://ent.appledaily.com隨時重溫節目。
採訪：比華利、懷鈺 攝影：陳順禎
髮型：EveChui&DerrickNg（Chin.G）
版主：凌零發
圖文並茂戰文壇 Kris-P
Kris-P：其實你會唔會考慮出本寫作嘅書呢？因為今次本書都好多篇幅係文字，而且好吸引。
林二汶：我都想出一本好多文字嘅書，但我都會加一啲插畫落去，因為有時圖畫表達到嘅嘢，文字係表達唔到，所以點解唔兩樣嘢加埋一齊做，等多啲化學作用呢。
六月出碟兼開騷 大埔阿思
阿思：Hello，有網友想問吓你幾時開concert呀？
林二汶：我哋出咗碟之後，就會開concert㗎喇。
阿思：咁幾時出碟？好期待呀！
林二汶：出碟會喺五月、六月嘅時間啦。
阿思：咁即係喺六月之後有concert睇？
林二汶：冇錯！希望啦，大concert就未必，但一定有一啲live騷畀大家睇。
阿思：因為上次你出新書，有個miniconcert㗎嘛，個感覺好close呀，同你嘅距離近咗好多啦，咁你會唔會用呢種方式去開concert呀？
林二汶：要視乎新碟嘅歌出到嘅係咪要咁處理啦，因為有時啲歌嘅類型要用其他方式表達，可能要多啲setting嘅，但係你都知道at17都係比較closely少少，所以視乎情況啦！
肥妹生涯
林二汶自資出書大談肥妹生涯，當中更有不少由她親自繪畫的漫畫，她又替身體的脂肪改名做「GiGi」及「芳芳」，與她們化敵為友，前晚林二汶在《娛樂開CHAT》便即場畫肥有肥福的自畫像送給讀者！
娛樂開CHAT：農夫、關心妍下周輪流上
各位娛樂版擁躉，有興趣和你的偶像傾談嗎？《娛樂開CHAT》將請來農夫及關心妍擔任嘉賓，分別於4月22日（下周二）和4月23日（下周三）與讀者談天說地，只要你有webcam及headset，並於當日6:30pm準時登入 http://ent.appledaily.com即可，節目於當晚7:00pm在《蘋果》網站直播。
