林敏驄（阿驄）噚日喺佐敦一間餐廳舉行佢嘅新碟《我愛你》記者會，安排咗兩個打扮成護士嘅女模特兒傍住佢影相，問佢做乜嘢搵兩個護士嚟？阿驄話：「呢排啲新聞太激，咪搵兩個護士醫吓我囉！」問佢會點樣醫？佢好無厘頭咁話：「用Email醫囉。」
冇戴結婚戒指
阿驄出完呢隻碟，之後又會同曾志偉再出多一隻碟，跟住仲會搞棟篤笑，問佢呢排咁多佢同佢老婆嘅新聞，係咪為咗呢一連串嘅工作做宣傳？阿驄反問記者：「你話呢？」記者梗係答係喇！點知佢竟然話：「乜你咁叻嘅。」咁佢即係默認。另外，又有人話佢最近冇戴結婚戒指，記者問佢做乜嘢唔戴，佢就問記者：「咁你又唔戴？」記者話自己都未結婚，阿驄就話：「我都未呀……今日。」
冇時間返屋企
佢話呢張唱片係同歌迷嘅集體回憶，大部份嘅歌都係佢一手包辦作曲同埋作詞。問佢邊啲歌係寫佢近排嘅心情，有冇講佢嗰單綠帽疑雲？阿驄即刻扮聽唔到，佢話：「乜嘢老母疑雲呀？」之後就叫記者自己估邊隻歌，記者揀咗嗰首《不能在一起》同《我會讓自己不再受傷》，阿驄話：「《不能在一起》係有感而發寫嘅，《我會讓自己不再受傷》咪唔畀自己受傷囉，所以叫咗兩個護士𠱁囉。」
佢仲講到自己好忙，忙到冇乜時間返屋企咁話。問佢老婆陳伶俐唔會投訴咩？佢話：「佢會體諒㗎啦，唔使做咩！」問佢老婆做乜嘢唔出現撐場？佢就話免得成日晒恩愛，搞到人哋以為佢係FamilyMan，唔搵佢做嘢喎！
採訪：胡比攝影：陳慧安
