你身邊也許有這樣一位女性朋友，她們磊落大方。
「我好憎啲女仔，着短裙又驚走光，你一係就咪着！」焦媛說。她們不矯揉造作。
「我好𤷪啲電視劇，男女主角掂吓嘴唇就當Kiss，你對住男友邊會咁㗎？」趙學而說。她們自我好勝。
「如果我鍾意個男仔，一定爭取！如果男仔有女友又對我有感覺，咁係男方責任，佢自己搞掂！」趙學而說。
她們都是呢期生日的白羊座。唏，你有冇Miss咗？
記者：劉嘉蕙
攝影：林栢鈞
純情也有獸性時
娛圈白羊女藝人尚有卓韻芝及好勝Gigi，大概都是寧死不屈的烈女。
焦媛也不喜歡輸。話說話題劇《VV勿語》尾場，她跟羅冠蘭郭錦恩排排坐聽觀眾分享，有位OL型女觀眾拿咪猛讚羅郭，焦媛不妒但也不快。明明三個人喺度，你點解可以當我冇到？「當時我保持微笑，事後很不開心，我覺得那位觀眾沒禮貌。其實我明明可以直接表達自己情緒，問佢何必偏偏數漏我，但我選擇以微笑掩飾。」由是啓發焦媛，女人有好多面，也由是創作《心太野》，講性格極端的兩個女子：熱情豪放跳舞女郎及含蓄保守OL，最後發現原來你即是我。
「人有善就有惡，最純情的女仔，一定有最Wild一面，留在她覺得安全的地帶，悄悄釋放，反之亦然。這個劇，正想探討女性陰暗面。」
外表Open內裏斯文
03年組劇團，讓焦媛選擇權更大，從《赤之禁室》、《誘心人》、到《VV勿語》及《心太野》，她不怕一次又一次闖進敏感地帶，成功穩守票房，但也不能避免招惹到保守分子。
「初搞劇團，一副有殺錯冇放過心態，雜誌找我影封面，着性感衫、攞皮鞭，我照做，但試過有標題話我玩3P，一開始形象就很差。」
她私下深閨不愛蒲，同一個男友拍拖9年，自言跟宣傳形象是兩個極端。「被當成豪放女，我唔覺慘，我的心態是，無非都係想人注意套劇買飛入場，這方面我想得很實際。但慢慢我發覺睇娛樂版的人都不是會花兩百蚊看劇的人，現在便學精了，寧願畀錢在地鐵賣廣告啦。」
其實我何嘗不是抱「焦媛是烈女」的心態去做訪問，結果發現她一點都不凌厲，見到我，像初出道等機會的新人，主動上前握手「Hello，我係焦媛。」
我係10年前焦媛
焦媛遇上趙學而，一拍即合。
「其實焦媛做緊嘅咪就係我10年前嘅嘢囉！」趙學而跟着數，從《尋開心》啦、《我恨我是女人》啦、還有《自欺欺人》，「我將自己見到的事帶入歌曲，就俾人話係情慾女歌手！」
講感情，她比焦媛更白羊，「如果男仔有女友我會一直企喺度保持好友關係，佢處理唔到係佢嘅事。」「點可能仲做朋友？我實退出！」焦媛反應大。「以前我似你咁，但𠵱家年紀有番咁上下，唔可以放棄權利！」趙學而豪邁大笑。做唔成情侶做性伴？「唔得！白羊座唔可以有性冇愛。」
她在劇中演斯文OL，自言真人更似熱情女郎，較忠於自己，「做完《皆大歡喜》，周圍很多聲音說我下一步該唱番歌，或點點點，但沒理由為人家的話而活，於是花了一年給自己反思，收入暴跌㗎！但總算想清楚自己想做甚麼。」未來就是要做未做過的事，所以今次演歌舞劇。「我唔鍾意跳舞！」趙學而老實得嚇人一跳，「一提起跳舞就無自信，覺得好似一棚骨喺度郁，但我點都要挑戰一次。」
宣傳海報，二人鬥少布，戲內焦媛主力跳、趙學而賣唱。「如果有得重演，掉轉角色做都得！」兩個白羊女許下豪願，臨尾都要補趙學而呢句，「我唔介意用身體演戲！」
劇壇新人王一男夾兩女
夾在兩個白羊女中間的陳健豪，在《心太野》中將一人分飾四角，象徵四種典型港男。拍着兩名經驗豐富女演員，「佢哋好好人，冇壓力！排戲成日搞爛Gag！」咪好似男花瓶？「佢啲戲仲多過我！」焦媛搶答。個人Buy野性定純情？「哦，兩種都好好，都鍾意。」所以話呢，男人都係……
《心太野》
日期： 5月7-12日（8:15pm）
5月10-12日（2:30pm）
地點：香港文化中心劇場
票價：$190、$280