自從加入車版後，出埠嘅次數比以前做旅遊版時少好多，只係間唔中有機會飛去外國試車。最近一次就係有油公司邀請傳媒到意大利，試吓落Track揸拉利嘅滋味。可能Shell同法拉利關係一直良好，於是乎破天荒帶咗全球50名記者踩場，直踩佢哋嘅總部Maranello。由香港飛到德國Frankfurt再轉機去意大利Bologna。我為食，想到Bologna即刻諗起Bolognese肉醬意粉，心諗去到仲唔第一時間食番碟正宗肉醬意粉過吓口癮？
殊不知去到Bologna，機場靜悄悄，人影都唔多個，莫講話餐廳，就算由專車直接送抵離Bologna約30分鐘車程嘅Maranello，兼且再去埋酒店都係無嘢食。惟有夥同行家前輩，行足30分鐘到市中心搵食，點知……間間舖都閂門瞓晏覺，幾經辛苦先至買到件Pizza食……哈，點知呢段路程嘅最大得益，反而係喺途中首次見到紅爆歐洲嘅小車新人王Fiat500囉！（四之一）
記者、攝影：加菲