自從蘇澤光（積蘇）舊年4月底走人，電盈（008）人工最高嘅，應該輪到董事總經理艾維朗（AA），噚日佢哋出咗07年報，AA果然最高薪，總人工袋2669萬港銀，加咗26%，但其實佢花紅減咗33萬銀。AA之前都講過，佢嘅花紅同電盈股價掛鈎，雖則恒指上年全年升咗，但電盈股價就跌不停，睇AA嘅花紅就知啦。
AA加得多嘅係薪金及津貼，比06年度多咗545萬，收1693萬銀，增幅近五成。華華睇番再前一年嘅年報，發現06年積蘇嘅薪金及津貼都只係1662萬，事隔一年，AA人工已經追上前年嘅積蘇，呢個算唔算係一個啓示呢？咁當然，呢一年通脹升得咁急，加多啲都係啱嘅。